ಹಾಗೇ ಸುಮ್ಮನೇ

ಕನಸುಗಳು

2011-12-06T08:49:00.000-08:00

ಕನಸುಗಳ ಮಾರುವ ಊರಿಗೆ ಬನ್ನಿ
ಅಲ್ಲಿ ಸಂತೆಯಲ್ಲಿ ಕುಳಿತಿದ್ದಾನೊಬ್ಬ ಸಂತ

ಕೊಳ್ಳುತ್ತಿದ್ದಾರೆಲ್ಲ ಬಣ್ಣಬಣ್ಣದ ಕನಸುಗಳ
ಇವ ಮಾತ್ರ ನಗುತ್ತಿದ್ದಾನೆ ಎಲ್ಲರ ಅವಸರ ನೋಡಿ
ಇಂದಿರುವುದು ನಾಳೆಯಿಲ್ಲ ನಾಳೆಯೆಂಬುದ ಕಂಡವರಿಲ್ಲ
ಆದರೂ ಕನಸುಗಳ ಮಾರಟಕ್ಕೆ ಧಕ್ಕೆ ಇಲ್ಲ

ಒಂದು ದಿನ ಬದುಕು ಬದಲಾಗಿ ಬಂಗಾರವಾಗುತ್ತದೆ
ಈ ಕನಸನ್ನು ಜನ ಹರಾಜಲ್ಲಿ ಕೂಗುತ್ತಿದ್ದಾರೆ
ಒಂದೇ ಬಾರಿ ಆ ಚೆಲುವೆ ನನ್ನವಳಾಗಲೆಂಬ ಕನಸಿಗೆ
ಎಲ್ಲಾ ಪ್ರಾಯದವರು ಸರದಿಯಲ್ಲಿ ಕಾಯುತ್ತಿದ್ದಾರೆ

ಮನಸ್ಸಿನ ಬಾವನೆಗಳ ಮುಚ್ಚಿಟ್ಟುಕೊಂಡು
ಬದುಕುತ್ತಿರುವ ನಮಗೆಲ್ಲಾ ಬದುಕುವ ಭರವಸೆ ಈ
ಕನಸುಗಳು ನನಸಾದರೆ ಕಲ್ಪನೆಗೂ ವಾಸ್ತವಕ್ಕು
ಆಗುವ ತಾಕಲಾಟದ ನೋವು ಯಾರಿಗೆ ಬೇಕು

ಬೇಡ ಇನ್ನೊಮ್ಮೆ

2011-07-20T08:23:00.000-07:00

ಹೃದಯವೇ ಬೀಳಬೇಡ ಮತ್ತೊಮ್ಮೆ ಪ್ರೀತಿಯ ಬಲೆಯಲಿ
ಡೊಂಕು ನಾಯಿಬಾಲದಂತೆ ಎಂದೆಂದಿಗೂ ನೇರವಾಗದೆ
ಇರಬೇಡ

ಕೈ ಕೈ ಹಿಡಿದು ರಾಜ ರಾಣಿಯರು ನಾವು
ಈ ಲೋಕ ಇರುವುದೇ ನಮಗೆಂದು
ಭ್ರಮೆಯಲ್ಲಿ ಒಮ್ಮೆ ಬಿದ್ದಿದ್ದೆ ಅಂದು
ನೀರ ಗುಳ್ಳೆಯಂತೆ ಕನಸು ಕರಗಿ
ನೀರಿನಿಂದ ಹೊರತೆಗೆದ ಮೀನಿನಂತೆ
ನರಳಿದ್ದಷ್ಟು ಬೇಗ ಮರೆತು ಹೋಯಿತೆ

ಮಾಗಿಯ ಚಳಿಗೆ ಮಾಗಿದ ಮೈ ಮನ
ಬೆರೆತಾಗ ಹಂಚಿಕೊಂಡ ಭರವಸೆಗಳು
ಉಸಿರಿರುವವರೆಗು ಒಂದಾಗಿರುತ್ತೇವೆಂಬ
ಆಶ್ವಾಸನೆಗಳು ಅಷ್ಟುಬೇಗ ಅಳಿಸಿ ಹೋಯಿತೆ
ಚೂರಾದ ಮನಸ್ಸು ತೇಪೆ ಹಾಕಲು ಪಟ್ಟ ಶ್ರಮ
ಸಮಯ ಹರಣ ಮತ್ತೊಮ್ಮೆ ನೆನಪಿಸಿಕೊ

Opportunity to give back something to society

2011-05-09T23:48:00.000-07:00

ನೀ ನಾನಾಗಿದ್ದರೆ

2011-05-07T22:13:00.000-07:00

ನೀನು ನಾನಾಗಿದ್ದರೆ ತಿಳಿಯುತ್ತಿತ್ತು ನನ್ನ ಮನದಾಳದ ತಳಮಳ
ನನ್ನ ಕನಸುಗಳೆಲ್ಲಾ ನೀನೇ ತುಂಬಿರುತ್ತಿದ್ದ ಆ ಕಳವಳ

ಹೇಳದೆ ಹೇಳಲಾಗದೆ ಮನಸಿನಲಿ ಉಳಿದ ಮಾತುಗಳೆಷ್ಟೋ
ಕಣ್ಣಂಚಿನಲಿ ಜಾರದಂತೆ ತಡೆದಿಟ್ಟ ಕಂಬನಿ ಹನಿಗಳೆಷ್ಟೋ
ನಿನ್ನ ನೆನಪಲೆ ಕಳೆದುಕೊಂಡ ಸವಿಘಳಿಗೆಗಳೆಷ್ಟೋ
ಒಂದು ನಿಮಿಷ ಮರೆಯಾದರೆ ನೀನು ನರಳಿದ ಕ್ಷಣಗಳೆಷ್ಟೋ

ಹೆಗಲಿಗೊರಗಿ ಸುಖನಿದ್ದೆಯಲಿ ನೀ ಕಳೆದು ಹೋಗುತ್ತಿದ್ದೆ
ಈ ಪ್ರೀತಿ ಕೊನೆ ತನಕವೆಂಬ ಭ್ರಮೆಯಲ್ಲಿ ನಾನಿರುತ್ತಿದ್ದೆ
ನೀ ಕಚ್ಚಿ ಕೊಟ್ಟ ಮಿಡಿ ಮಾವಿನ ಅಮೃತ ಸವಿಯ ಸ್ವರ್ಗ
ನೀ ಕಾರಣ ಕೊಡದೆ ತೊರೆದ ಹೋದ ನೋವಿನ ನರಕ

ನನ್ನ ತಂಗಿಯ ಮೊದಲನೇ ಪುಸ್ತಕ ಬಿಡುಗಡೆ

2011-04-14T06:34:00.000-07:00

ಆತ್ಮೀಯರೇ
ನನ್ನ ಕಣ್ಣೆದುರೇ ಬೆಳೆದ ಮುದ್ದಿನ ನನ್ನ ತಂಗಿ ಸೌಮ್ಯ (ಪ್ರಜ್ಙ). ಇಂದು ಭೌದ್ದಿಕ ಮಟ್ಟದಲ್ಲಿ ತುಂಬಾ ಎತ್ತರಕ್ಕೆ ಬೆಳೆದಿದ್ದಾಳೆ.
ಇದೇ ಶನಿವಾರ ಮಧ್ಯಾಹ್ನ ೩:೩೦ ಕ್ಕೆ ಅವಳ ಪ್ರಥಮ ಕಥಾ ಸಂಕಲನ ಬಿಡುಗಡೆ. ದಯವಿಟ್ಟು ಬನ್ನಿ. ಅವಳಿಗೆ ನಿಮ್ಮ ಪ್ರೀತಿಪೂರ್ವಕ ಹರಕೆ ಇರಲಿ.

ನಿಮ್ಮವ
ಪ್ರಶಾಂತ

ನಿನ್ನ ಪ್ರೀತಿಯ ಕಾಣಿಕೆ

2011-03-01T07:30:00.000-08:00

ಕಣ್ಣಂಚಿನ ಕಂಬನಿ ತುಟಿಯಂಚಿನ ವಿಷಾದ
ಹ್ರದಯದಿ ಹೊತ್ತಿ ಉರಿಯುವ ಬೆಂಕಿ
ಎಲ್ಲಾ ನಿನ್ನ ಪ್ರೀತಿಯ ಕಾಣಿಕೆ

ಸುಮ್ಮನಿದ್ದ ನನ್ನಲ್ಲಿ ಕನಸುಗಳ ಚಿಗುರಿಸಿದವಳು ನೀನೆ
ಆನಂದ ಸಾಗರದಿ ತೇಲುತ್ತಿದ್ದ ನನ್ನ ಮುಳುಗಿಸಿದವಳು ನೀನೆ
ಭರವಸೆಯ ಭರಪೂರ ಹರಿಸಿ ಬದುಕು ಕಟ್ಟಿದವಳು ನೀನೆ
ಕಟ್ಟಿದ ಗೂಡನ್ನು ಒದ್ದು ನೆಲಸಮ ಮಾಡಿದವಳು ನೀನೆ

ನೀನೇಕೆ ಮುನಿಸಿಕೊಂಡು ಹೋದೆ ನನಗಂದು ತಿಳಿಯಲೇ ಇಲ್ಲ
ಮೂರ್ಖ ನಾನು ಸ್ವಾರ್ಥಕ್ಕೆ ನೀ ತೊಡಿಸಿದ್ದೆ ಪ್ರೀತಿ ಮುಖವಾಡ
ನಿನ್ನ ಹಗಲು ವೇಷದ ಆಟ ನನಗೇಕೋ ತಿಳಿಯಲೇ ಇಲ್ಲ
ಹಾಡು ಮರೆತ ಮೂಕ ಹಕ್ಕಿಯ ಯಾತನೆ ನನ್ನಲ್ಲಿಂದು

ಮರೆಯ ಬೇಕೆಂದರೂ ಹೇಗೆ ಮರಯಲೆ ನಾ ನಿನ್ನ
ಮೈ ಮೇಲಿನ ಮಚ್ಚೆ ಹಳೆ ಗಾಯದ ಗುರುತಿನಂತೆ ನೀನು
ಉತ್ತರ ಸಿಗದ ಪ್ರಶ್ನೆಗಳು ಕಾಡುವ ಅವಮಾನ
ಹುಸಿ ಕಾರಣ ಕೊಡಲಾದರು ಮತ್ತೊಮ್ಮೆ ಸಿಗುವೆಯಾ

ಮನಗಾಳದ ಮಾತು

2010-12-23T02:04:00.000-08:00

ನನ್ನ ಬಿಳಿ ಬಣ್ಣ ನೀ ತೆಗೆದುಕೊ
ನಿನ್ನ ಬಿಳಿ ಮನಸ್ಸು ನನಗೆ ಕೊಡು

ನನ್ನ ಸುಖದ ಸುಪ್ಪತ್ತಿಗೆಯ ನೀ ತೆಗೆದುಕೊ
ನಿನ್ನ ಸವಿ ನಿದ್ರೆಯ ಕಲ್ಲು ಮಂಚವ ನನಗೆ ಕೊಡು
ನನ್ನ ಅಹಂಕಾರ ಪ್ರತಿಷ್ಟೆಯ ನೀ ತೆಗೆದುಕೊ
ನಿನ್ನ ನಿರ್ಮಲ ಪ್ರೀತಿ ಸ್ನೇಹವ ನನಗೆ ಕೊಡು

ನನ್ನ ಅತೀ ಬುದ್ಧಿವಂತಿಕೆಯ ನೀ ತೆಗುದುಕೊ
ನಿನ್ನ ಮುಗ್ಧ ನಿಷ್ಕಲ್ಮಶ ಹೃದಯ ನನಗೆ ಕೊಡು
ನಿನ್ನೆಡೆಗೆ ಬರಲಿರುವ ತೊಡುಕುಗಳ ನಿ ತೆಗೆದುಕೊ
ನನ್ನ ನಿನ್ನಲ್ಲಿ ಸೇರಿಸಿ ಕೊಂಡು ಧನ್ಯನಾಗಿಸಿಕೊ

ನಾನೆಲ್ಲೋ ನೀನೆಲ್ಲೋ

2010-12-01T02:32:00.000-08:00

ಮರಳ ಮನೆ ಮಾಡಿ ನೀ ಬರುವೆಯೆಂದು
ಕಾಯುತ್ತಿರುವೆ ಮಳೆಯ ಕಾಯುವ ನವಿಲಿನಂತೆ
ಅಲೆ ಬಂದು ಕೊಚ್ಚಿ ಕೊಂಡೊಯ್ಯುವ ಮುನ್ನ
ನೀ ಬಂದು ಕೂಡುವೆಯಾ ನನ್ನ

ಕಲ್ಲೆಸೆದು ಉರುಳುಸುತ್ತಿದ್ದ ಆ ಮಿಡಿ ಮಾವು
ನಿನ್ನ ಲಂಗದಂಚಿನಲಿ ಕಚ್ಚಿ ನೀ ಕೊಟ್ಟ ಪಾಲು
ಮನತುಂಬಿ ನನಗಾಗಿ ಹಾಡುತ್ತಿದ್ದ ಹಾಡು
ಬರಲಾರವೇ ಆ ದಿನಗಳು ಇನ್ನೊಮ್ಮೆ

ನನ್ನೊಳು ನೀ ನಿನ್ನೊಳು ನಾ ತುಂಬಿಕೊಂಡು
ಊರಿಗೇ ನಾವೇ ರಾಜ ರಾಣಿಯರಂತೆ ಮೆರೆದು
ನಿನ್ನ ಅಧರಾಮ್ರತವೇ ಹೊಟ್ಟೆ ಹಸಿವ ತಣಿಸುತ್ತಿದ್ದ
ಸವಿ ದಿನಗಳ ನೆನಪಲ್ಲೇ ಕಾಯುತ್ತಿರುವೆ

ನಾನೇ ನನ್ನ ಮೇಲೆ ನಂಬಿಕೆ ಕಳೆದುಕೊಂಡು
ಜೀವನದ ಕೊನೆಯ ತಿರುವಲ್ಲಿ ನಿಂತಿದ್ದಾಗ
ಭರವಸೆಯ ಭಾವ ಹರಿಸಿ ಪುನರ್ಜನ್ಮ ಕೊಟ್ಟ
ನೀ ಬರಲಾರೆ ಎಂದು ತಿಳಿದಿದ್ದರೂ ಕಾಯುತ್ತಿರುವೆ

ಆ ದಿನಗಳು

2010-10-06T05:56:00.000-07:00

ಯಾಕೋ ಕಾರಣವಿಲ್ಲದೆ ಬೇಸರ ಕಾಡುತ್ತಿದೆ. ಎಲ್ಲಾ ಇದ್ದೂ ಏನೂ ಇಲ್ಲದಂತೆ. ಸಂತೆಯ ಮಧ್ಯೆ ಕಾಡುವ ಏಕಾಂತದಂತೆ.
ನಾನೂ ನನ್ನ ಗೆಳೆಯರೆಲ್ಲ ಅವರವರ ಯಾಂತ್ರಿಕ ಜೀವನದಲ್ಲಿ ಕಳೆದು ಹೋಗಿದ್ದೇವೆ.
ನಾನು ನನ್ನದೇ ಕನಸುಗಳನ್ನು ಕಟ್ಟಿಕೊಂಡು ಸಿಗದಿರುವುದರ ಹಿಂದೆ ಓಡುತ್ತಿದ್ದೇನೆ.

ಎಲ್ಲಿ ಕಳೆದು ಹೋದವು ಅಲ್ಪ ಸುಖದಲ್ಲಿ ಖುಶಿ ಪಡುತ್ತಿದ್ದ
ಆ ದಿನಗಳು
ಏನಾದವು ಸಣ್ಣ ಪುಟ್ಟದರಲ್ಲೂ ಅಗಾಧ ಸಂತಸ ಪಡುತ್ತಿದ್ದ
ಆ ದಿನಗಳು

ಹಾರಾಡುವ ಹಕ್ಕಿಯ ಕಂಡು ಕೌತುಕ ಪಡುತ್ತಿದ್ದ
ಆ ದಿನಗಳು
ಹಕ್ಕಿಗಿಂತೆತ್ತರದಿ ಹಾರಾಡುತ್ತಿರುವಾಗೇಕೆ ಸಂತಸ
ಉಕ್ಕುತ್ತಿಲ್ಲ

ಗುಲಾಬಿಯ ಮೇಲಿನೆ ಮಂಜಿನ ಸ್ಪರ್ಶಕೆ ಪುಳಕವಾಗುತ್ತಿದ್ದ
ಆ ದಿನಗಳು
ಹೂಗಳ ಪಲ್ಲಂಗದ ಮೇಲೇಕೆ ಚುಚ್ಚುತ್ತಿವೆ ಕೇವಲ
ಮುಳ್ಳುಗಳು

ಅರೆಹೊಟ್ಟೆಯಲ್ಲಿ ಮಲಗಿ ಹಬ್ಬದೂಟದ ಕನಸು ಕಂಡಾಗಿನ
ಪುಳಕ
ಪ್ರತಿದಿನ ಮೃಷ್ಟಾನ್ನ ಭೋಜನ ಮಾಡಿದರೂ ಏಕಿಲ್ಲ
ಸಂತಸ

ಕಾಲದ ಮಹಿಮೆ

2010-09-20T00:55:00.000-07:00

ಮರೆಯಾಗಿತ್ತು ಕಾಣಬೇಕೆಂಬ ದಶಕಗಳ ತುಡಿತ
ಆಕೆಯ ನಿನ್ನೆ ಕಂಡಾಗ
ನನ್ನ ನಾನೇ ಪ್ರಶ್ನಿಸುವಂತಿತ್ತು ಇವಳೇನಾ
ನನ್ನಂದಿನ ಮನದನ್ನೆ

ಮನಸು ಹೊರಡುತ್ತಿತ್ತು ಬಣ್ಣದ ತೇರಿನ ಮೆರವಣಿಗೆ
ಅವಳ ಜೊತೆ
ಕನಸು ಮೀಸಲಾಗಿತ್ತು ಕೇವಲ ಅವಳಿಗೆ
ಇಂದವಳು ಅಪರಿಚಿತೆ

ಹಂಚಿ ತಿಂದ ಅನ್ನ ಹಾಲ ಬಿಳುಪಿನ ಅವಳ ಬಣ್ಣ
ತೆಕ್ಕೆಯಲ್ಲಿ ಕರಗುತ್ತಿದ್ದಾಗಿನೆ ದೈವಿಕ ಸುಖ
ಅವಳನ್ನಗಲಿದಾಗ ಶೂನ್ಯವಾಗಿ ಕಂಡಿದ್ದ ಜಗತ್ತು
ಭ್ರಮೆಯೇ ಎಂಬ ಶಂಕೆ

ವಿಜಯ ಹಾವನೂರ್

2010-08-16T03:03:00.000-07:00

ನಿನ್ನೆ ಆದಿತ್ಯವಾರ ಸಂಜೆ ತುಂಬಾ ಅರ್ಥಪೂರ್ಣವಾಗಿ ಕಳೆದೆ. ಆತ್ಮೀಯರಾದ ವಿಜಯ ಹಾವನೂರ್ ಮನೆಗೆ ಬಂದಿದ್ದರು.
ವೃತ್ತಿಯಲ್ಲಿ ಸಂಸ್ಕೃತ ಅಧ್ಯಾಪಕರಾಗಿರುವ ಇವರು ಕರ್ನಾಟಕದ ಒಬ್ಬ ಉತ್ತಮ ಸುಗಮ ಸಂಗೀತ ಗಾಯಕ ಮತ್ತು ಸಂಯೋಜಕ.
ಎಲ್ಲದಕ್ಕಿಂತ ಮಿಗಿಲಾಗಿ ಇವರೊಬ್ಬ ಉತ್ತಮ ಸಂಸ್ಕಾರ ಹೊಂದಿರುವ ಸ್ನೇಹಜೀವಿ. ಅಮೇರಿಕಾದಲ್ಲಿ ನಡೆಯುವ ಅಕ್ಕ ಸಂಸ್ಠೆಯ ಕಾರ್ಯಕ್ರಮದಲ್ಲಿ ಪಾಲ್ಗೊಳ್ಳಲು ಸಿದ್ದತೆ ನಡೆಸುತ್ತಿದ್ದಾರೆ.
ನಾವಿಬ್ಬರೂ ಸೇರಿ ಅವರ ಬಗ್ಗೆ ಮಾಹಿತಿ ಕೊಡುವ ಒಂದು ಬ್ಲಾಗ್ ಶುರು ಮಾಡಿದ್ದೇವೆ. ದಯವಿಟ್ಟು ಭೇಟಿ ಕೊಡಿ. ನಮಸ್ಕಾರ.

http://vijayhavanur.blogspot.com/

ನಾನು ನೀನು

2010-07-29T02:20:00.000-07:00

ನಾನು ನೀನು ನೀನು ನಾನು
ಎಂದಾದೇವು ನೀನೇ ನಾನು ನಾನೇ ನೀನು

ವೈಣಿಕನಿಲದ ವೀಣೆಯ ತರದಿ
ನುಡಿಸುವರಿಲ್ಲದ ಕೊಳಲಿನ ತರದಿ
ಒಬ್ಬರನೊಬ್ಬರು ಅಗಲಿ ಬದುಕೆ
ಬರಡು ಮರುಭೂಮಿ ಜೀವಿತ

ಅರ್ಪಣೆ ಸಮರ್ಪಣೆ ಇಲ್ಲದ ಬಾಳು
ನೆನೆದರೇ ನಡುಕ ಮನದಲಿ
ಎಂದು ಮರೆತೇವು ನಮ್ಮ ಹಮ್ಮು
ಒಂದಾದೇವೆಂದು ನೆಮ್ಮದಿಯನರಸಲು

ಪ್ರಾರ್ಥನೆ

2010-06-19T07:19:00.000-07:00

ನಾಳೆಗಳ ಭಯದಲ್ಲಿ ನಿನ್ನೆಗಳ ಹತಾಶೆಯಲ್ಲಿ
ಕಳೆಯುತ್ತಿದೆ ಇಂದಿನ ಸುಂದರ ದಿನ

ಅವರಿವರ ಕಟುಕುಟುಕು ಮಾತಿನಲ್ಲಿ
ಮನವಿರಿಯುವ ಅಗೌರವದ ನೀತಿಯಲ್ಲಿ
ಮರೆತಿರುವೆ ಜೀವನದ ಗುರಿಯ

ರಾಮನಿಗೂ ತಪ್ಪಿದ್ದಲ್ಲ ಅಪವಾದ
ಸೀತೆಗೂ ತಪ್ಪಿದ್ದಲ್ಲ ನಿಂದನೆ
ಹುಲುಮಾನವನಾದ ನನಗೇಕೆ ಚಿಂತೆ

ನನ್ನಂತರಂಗವ ಶುದ್ದವಾಗಿಟ್ಟು ಕೊಂಡು
ನಿನ್ನ ಕರುಣೆಯ ಸೆಲೆಯ ಮರೆಯದೆ
ಬದುಕುವ ಬಾಗ್ಯವ ಕೊಡು ದೇವಾ

ಹುಡುಕಾಟ

2010-04-17T07:22:00.001-07:00

ಮನದ ಚೆಲುವ ತೋರಿಸುವ ಕನ್ನಡಿಯ
ಹುಡುಕುತ್ತಿದ್ದೆ
ಹುಚ್ಚ ಮುಖದ ಚೆಲುವ ನೋಡಿ ಖುಶಿ ಪಡೆಂದು
ನಗುತ್ತಿದ್ದರೆಲ್ಲಾ

ಅಮ್ಮನ ಪ್ರೀತಿಯ ಸೆಲೆ ತೋರಿಸುವ
ಪ್ರೇಯಸಿಯ ಒಲವಿನ ಅಲೆ ತೋರಿಸುವ
ಗೆಳೆಯನ ಆತ್ಮೀಯತೆಯ ನೆಲೆ ತೋರಿಸುವ
ಯಾರಾದರೂ ಒಬ್ಬರಿದ್ದಾರೆಯೆ ಹುಡುಕುತ್ತಿದ್ದೆ

ತಪ್ಪು ತಿದ್ದುವ ಪ್ರಬುದ್ದ ಗುರುವಿನಂತೆ
ಜೀವನದ ದಾರಿ ತೋರಿಸುವ ದಾರ್ಶನಿಕನಂತೆ
ಕೈ ಹಿಡಿದು ನಡೆಯುವ ಮುಗ್ಧ ಮಗುವಿನಂತೆ
ಯಾರಾದರೂ ಒಬ್ಬರಿದ್ದಾರೆಯೆ ಹುಡುಕುತ್ತಿದ್ದೆ

ದೊಡ್ಡ ಕಣ್ಣು ಬಿಟ್ಟು ಕಥೆ ಕೇಳುತ್ತಿದ್ದ ಗೆಳತಿಯಂತೆ
ರಾಮಾಯಣದ ನೀತಿ ಹೇಳುತ್ತಿದ್ದ ಅಜ್ಜನಂತೆ
ಹೊಟ್ಟೆ ಹಸಿದಾಗ ಅನ್ನ ಕೊಟ್ಟ ಅಕ್ಕನಂತೆ
ಯಾರಾದರೂ ಒಬ್ಬರಿದ್ದಾರೆಯೆ ಹುಡುಕುತ್ತಿದ್ದೆ

ಮುತ್ತು

2010-04-17T07:09:00.000-07:00

ನನ್ನವಳ ಮುತ್ತಿನ ಮಳೆ
ಮನದಲ್ಲಿ ಸಂತಸದ ಹೊಳೆ
ಕಳೆಯಿತೆಲ್ಲಾ ದುಃಖದ ಕೊಳೆ

ನಾನೇ ಸ್ವರ ನನ್ನವಳೆ ರಾಗ
ಮಧು ಮಂಚವೇ ವೀಣೆ
ಕೂಡಿ ಕಳೆವ ಕಾಡಿ ಪಡೆವ
ಮುತ್ತುಗಳೇ ಮಧುರ ಗಾನ

ಮುತ್ತಿನ ಮತ್ತೇ ಗಮ್ಮತ್ತು
ಮರೆಯುವುದೆಲ್ಲಾ ದೌಲತ್ತು
ನೀನಾರೆಂದು ಮರೆಸುವುದೇ
ಅದರ ಹಕೀಕತ್ತು

ಸುರಿಯುವ ಸ್ವಾತಿಮಳೆ ನವಿಲಿನ
ಕುಣಿತಕ್ಕೆ ಆಸರೆಯಾದಂತೆ
ಒಣಗಿರುವ ಮನದ ಮರಕ್ಕೆ
ನೀರೆರೆಯುವುದು ನನ್ನವಳ ಮುತ್ತು

ನಿಲುಕದ ತಾರೆ

2010-01-27T01:09:00.000-08:00

ನಿಲುಕದ ತಾರೆಗೆ ಚಾಚಿದೆ ಕ್ಯೆ
ಇದ್ದರೂ ದೂರ ಪಡೆಯಲಾರೆನೆಂಬ ಕಟು
ವಾಸ್ತವದ ಅರಿವಿದ್ದರೂ ಕೇಳದು ಮನ

ಎಷ್ಟೇ ಹೊಳೆದರೂ ಲೋಕಕ್ಕೆ ಬೆಳಕ
ಕೊಡದಿದ್ದರೂ ನನಗೇಕೋ ಅದರೆಡೆಗೆ
ತಡೆಯಲಾರದ ಸೆಳೆತ ದಿನೇ ದಿನೇ
ಮಿನುಗುತ್ತಾ ಗೊಳಿಸುತಿದೆ ಮನಸ ಚಂಚಲ

ಅಗಣಿತ ತಾರಾ ಮಂಡಲದ ಮಧ್ಯೆ
ನನ್ನ ಬಯಕೆ ಹಿಡಿಯಲೀ ಧ್ರುವತಾರೆಯ
ನನ್ನ ಕಂಡರೆ ತಡೆಯಲಾರದ ನಗು ಅದಕ್ಕೆ
ಸಹಸ್ರ ಕೋಟಿ ಅಭಿಮಾನಿಗಳಲ್ಲಿ ನಾನೊಬ್ಬ

ಎಂದಾದರೊಂದು ದಿನ ನನ್ನ ಬಯಕೆಯ
ತೀವ್ರತೆಗೆ ಕರಗಿ ಬಂದರೆ ನನ್ನೆಡೆಗೆ ಏನ ಮಾಡಲಿ
ಅದರ ಆಸೆಯಲ್ಲಿ ಕೊರಗುತ್ತಾ ಜೀವನ ಕಳೆಯುವುದೇ
ಮನಸ್ಸಿನಲ್ಲಿ ಕಣ್ಣೀರಾಗುವುದೇ ನೆಮ್ಮದಿ

ಹೊಸವರ್ಷದ ಶುಭಾಶಯಗಳು

2010-01-07T02:23:00.000-08:00

ನಾನು ಬರೆಯುವುದ ನನಗೆಂದು, ಎದೆ ಭಾರ ಕಳೆಯಲೆಂದು. ಬಿಡುವು ಮಾಡಿಕೊಂಡು ಬಂದು ಓದುವ ನಿಮ್ಮ ಪ್ರೀತಿಗೆಂದು.
ಪೇಜ್ ಕೌಂಟರ್ ಹಾಕಿ ೩ ತಿಂಗಳಾಯ್ತು. ೪೦೦ ಮಂದಿ ನನ್ನ ಬ್ಲಾಗ್ ವೀಕ್ಷಿಸಿದ್ದಾರೆ. ಕೆಲವರು ಮೆಚ್ಚಿ ಪ್ರೋತ್ಸಾಹಿಸಿದ್ದಾರೆ. ಅದೇ ನನಗೆ ಸಿಕ್ಕಿದ ಸನ್ಮಾನ.
ಯಾಕೋ ಕವಿತೆಯಷ್ಟು ಸುಲಭವಾಗಿ ಲೇಖನ ಬರೆಯಲು ನನಗಾಗುವುದಿಲ್ಲ. ಆದರೂ ಬರೆಯುವ ಪ್ರಯತ್ನ. ಕಟ್ಟಿ ಕೊಂಡವಳಿಗೆ ಕೋಡಂಗಿ ಮುದ್ದೆಂಬಂತೆ ನಾವು ಬರೆದದ್ದು ನಮಗಮೂಲ್ಯ.
೨೦೧೦ ನಿಯಮಿತವಾಗಿ ಬರೆಯಬೇಕೆಂಬ ಸಂಕಲ್ಪ ಮಾಡಿಕೊಂಡಿದ್ದೇನೆ. ಹೊಸವರ್ಷ ಆಗಲೇ ಚಿರಪರಿಚಿತವಾಗಿದೆ. ೨೦೦೯ ನೆನಪುಗಳು ಜ್ಯೂರಿಚ್ ಚಳಿಯಂತೆ ಉಡುಪಿಯ ಸೆಖೆಯಂತೆ ಪ್ರಖರವಾಗಿ ಕಾಡುತ್ತಿದೆ.
ನಿಮಗೆಲ್ಲ ಹೊಸವರ್ಷ ಹೊಸತನ, ಹೊಸ ಅನುಭವ, ಹೊಸಕನಸುಗಳ ಮೂಟೆಯನ್ನು ಹೊತ್ತು ತರಲಿ.
ಪ್ರೀತಿಯಿಂದ
ಪ್ರಶಾಂತ

ನಿನ್ನ ನೆನಪು

2009-12-28T03:07:00.000-08:00

ನನ್ನ ಬಾಳ ನೆಮ್ಮದಿಗೆ ಕಿಚ್ಚನಿಟ್ಟು
ಸುಖವ ಕಸಿದು ಕೊಂಡ ನೀನು
ನನ್ನ ಸಮಾಧಿಯ ಮೇಲೆ
ಅರಮನೆ ಕಟ್ಟಿ ಸುಖವಾಗಿರು

ನನ್ನ ಕನಸುಗಳ ನುಚ್ಚುನೂರು ಮಾಡಿ
ಜೊತೆಯಾಗಿ ಬದುಕುವ ಆಸೆಗೆ
ತಣ್ಣೀರೆರಚಿದ ನೀನು ಬರಿದಾಗಿಸಿದೆ
ಎದೆನೆಲವ ಪ್ರೀತಿ ಇನ್ನೊಮ್ಮೆ ಬೆಳೆಯದಂತೆ

ಲಲನೆಯರು ಸುತ್ತಮುತ್ತ ಸೇರಿ
ಕೂಡುವ ಕಳೆಯುವ ಆಟಕೆ ಬರುವಂತೆ
ಪ್ರೇರೇಪಿಸೆ ಅವರ ಕಡೆಗಣಿಸಿ
ಷಂಡನೆಂಬ ಬಿರುದು ಬರುವಂತೆ ಮಾಡಿದೆ ನೀನು

ಮರೀಚಿಕೆ

2009-11-20T21:04:00.000-08:00

ನಿನಗಾಗಿ ಹಂಬಲಿಸಿದೆ ನೀ ಬಂದು ನನ್ನ ಸೇರಿದಾಗ
ಎನು ಮಾಡಲೆಂದು ತಿಳಿಯದೆ ಚಡಪಡಿಸಿದೆ

ನೀನು ಸಿಕ್ಕರೆ ಬಾಳು ಸಕ್ಕರೆ ಜೀವನವೆಲ್ಲಾ ಅಕ್ಕರೆ
ಎಂಬ ಕನಸ ಕಂಡೆ ನೀ ಜೊತೆಯಾದ ಬಳಿಕ
ನಿನ್ನ ಪಡೆಯಲು ಪಟ್ಟ ಕಷ್ಟಗಳ ಸರಮಾಲೇಯೇ
ಮಧುರವೆನಿಸುತಿದೆ

ಕಂಡ ಕಂಡ ದೇವರಲ್ಲಿ ನಿನಗಾಗಿ ಹರಕೆ ಹೊತ್ತೆ
ಉಳಿದೆಲ್ಲ ಸುಖವ ಕಡೆಗಾಣಿಸಿ ನಿನಗಾಗಿ ಹಾತೊರೆದೆ
ಇಂದು ನೀ ಜೊತೆಗಿರಿ ನೆಮ್ಮದಿ ಸುಖ
ಹಗಲುಗನಸಾಗಿದೆ

ಒಂದು ಮುಸ್ಸಂಜೆ

2009-11-14T07:34:00.000-08:00

ಮುಸ್ಸಂಜೆಯ ತಂಗಾಳಿ ಸುಮಗಂಧ ಪಸರಿಸಿರೆ
ನದೀ ತೀರದಿ ನೀ ನನ್ನ ಬೆನ್ನಿಗಾತು ಕುಳಿತಿರೆ
ಇಳಿದಿತ್ತು ನಾಕವೇ ಭುವಿಗೆ ಮರೆಸಿತ್ತು ಇಲ್ಲಿನ ನರಕ

ಗೋವುಗಳ ಮಂದೆ ಊರಿನೆಡೆ ಸಾಗುತಿರೆ
ಕೊರಳ ಗೆಜ್ಜೆಯ ನಿನಾದ ಕಿವಿಯಲ್ಲಿ ಹಾಡುತಿರೆ
ನಿನ್ನ ಇನಿದನಿಯ ಮಾತು ಸುಮಧುರ ಸಂಗೀತ
ಹಕ್ಕಿಗಳ ಇಂಚರವೇ ಅದಕೆ ತಾಳ ಮೇಳ

ಪಡುವಣದಿ ಸೂರ್ಯ ಆಗಸದಿ ಕೆಂಪು ಹರಡಿರೆ
ನಿನ್ನ ಮೊಗದ ಕೆಂಪು ಅದರೊಡನೆ ಮಿಳಿತವಾಗಿರೆ
ಆವರಿಸುತ್ತಿದ್ದ ಕತ್ತಲಿಗೆ ನಿನ್ನ ಕಣ್ಣು ಮಿನುಗುತಿರೆ
ನನ್ನ ನಾನೇ ಮರೆತು ನಿನ್ನೊಳಗೆ ಸೇರಿದ್ದೆ

ನೀ ಕೊಟ್ಟ ಕಾಣಿಕೆ

2009-10-09T02:43:00.001-07:00

ಮರುಭೂಮಿಯಲ್ಲಿ ಮರೀಚಿಕೆಯ ಹಿಂಬಾಲಿಸಿ
ಹೊರಟ ಒಂಟಿ ಪಯಣಿಗ ನಾನೀಗ

ನಂದಾದೀಪವ ಹಚ್ಚುವೆ ಎಂದು ಕಾದರೆ
ಇದ್ದ ಹಣತೆಯನ್ನೂ ಆರಿಸಿದೆ
ಕನಸಿನ ಲೋಕದಿ ವಿಹರಿಸುತ್ತಿದ್ದವಗೆ
ತೋರಿಸಿದೆ ಕಟು ವಾಸ್ತವ

ಮನೆ ಮನ ಬೆಳಗಿಸಿವೆಯೆಂದು ಆಸೆಯಲ್ಲಿರೆ
ತಣ್ಣೀರೆರಚಿದೆ ಎಲ್ಲಾ ಬಯಕೆಗಳಿಗೆ
ಆದರೂ ನಾನಿಲ್ಲಿ ಬದುಕುತ್ತಿದ್ದೇನೆ
ಕಾಯುವವ ಕೊಲ್ಲುವ ತನಕ

ನಾನು - ನೀನು

2009-09-25T01:57:00.000-07:00

ನಿಂತ ಕಡಲು ನೀನು ನಿನ್ನ ಸೇರಲು
ಹಾತೊರೆದು ಹರಿದು ಬರುವ ನದಿ ನಾನು

ಸಾಗುವ ದಾರಿಯಲ್ಲೊಮ್ಮೆ ಜಲಪಾತವಾಗಿ
ಇನ್ನೊಮ್ಮೆ ಸೌಮ್ಯ ತೊರೆಯಾಗಿ
ಮತ್ತೊಂದೆಡೆ ಕೆಸರ ಗುಂಡಿಯಾಗಿ
ಛಲ ಬಿಡದೆ ನಿನ್ನೆಡೆಗೆ ಸಾಗಿ ಬರುವೆ

ಒಂದೆಡೆ ಸಾಗಿಸುವೆ ಹೆಣಗಳ ರಾಶಿ
ಇನ್ನೊಂದೆಡೆ ಪಾಪ ತೊಳೆಯುವ ಕಾಶಿ
ಯಾವುದೇ ಬಂಧನಕ್ಕು ಸಿಲುಕದೆ
ಛಲ ಬಿಡದೆ ನಿನ್ನೆಡೆಗೆ ಸಾಗಿ ಬರುವೆ

ಎಲ್ಲೋ ಅನ್ನಿಸಿತ್ತು ನಾನೇ ಸರ್ವ ಶ್ರೇಷ್ತ
ನಿನ್ನ ಅಗಾಧತೆಯ ನೆನಪು ಬಂದು ನನ್ನ
ಅಹಂಕಾರವ ಹೊಸಕಿ ಹಾಕಿತ್ತು
ಛಲ ಬಿಡದೆ ನಿನ್ನೆಡೆಗೆ ಸಾಗಿ ಬರುವೆ

ಈ ಒಂದು ರಾತ್ರಿಯ ಸಮಯ ಕೊಡು

2009-09-11T22:59:00.000-07:00

ನಿನ್ನ ನಗರಕ್ಕೆ ಬಂದಿದ್ದೇನೆ ದಾರಿಹೋಕನಾಗಿ
ಒಂದು ಬಾರಿ ಭೇಟಿಯಾಗುವ ಅವಕಾಶ ಕೊಡು

ನನ್ನ ಗುರಿ ಎಲ್ಲಿದೆ ನನ್ನ ಗಮ್ಯ ಎಲ್ಲಿದೆ
ಮುಂಜಾನೆ ನಿನ್ನ ಬಿಟ್ಟು ಹೋಗಲಿ ಎಲ್ಲಿ
ಎಂಬ ಯೋಚನೆ ಮಾಡಲಾದರು
ಈ ಒಂದು ರಾತ್ರಿಯ ಸಮಯ ಕೊಡು

ನನ್ನ ಕಣ್ಣಲ್ಲಿ ಬಚ್ಚಿಟ್ಟು ಕೊಂಡಿರುವೆ ನಿನ್ನ
ಕಣ್ರೆಪ್ಪೆಯಲ್ಲಿ ಹಿಡಿದಿಟ್ಟು ಕೊಂಡಿರುವೆ ಕಣ್ಣೀರು
ಅದಕ್ಕೊಮ್ಮೆ ಮಳೆಯಾಗಿ ಹರಿದು ಹೋಗಲು
ಈ ಒಂದು ರಾತ್ರಿಯ ಸಮಯ ಕೊಡು

ಮರೆಯುವುದು ಖಂಡಿತವಾಗಿದ್ದಾಗ ನಂಬಿಕೆ
ಹುಟ್ಟಿಸಿ ನಾನಿಂದು ನರಳುವಂತೆ ಮಾಡಿದ್ದೇಕೆ
ಈ ಕೆಲವೇ ಕಲವು ಪ್ರಶ್ನೆಗಳ ಕೇಳಲಾದರೂ
ಈ ಒಂದು ರಾತ್ರಿಯ ಸಮಯ ಕೊಡು

ಬದಲಾವಣೆ

2009-09-01T02:44:00.001-07:00

ಗೆಳೆಯ ಕಳಿಸಿದ ಇ-ಪತ್ರವನ್ನು ಇಲ್ಲಿ ಹಾಕಿದ್ದೇನೆ. ಅರ್ಥಪೂರ್ಣವಾದ ಲೇಖನ. ವರ್ತಮಾನದ ಪರಿಸ್ಥಿತಿಗೆ ಹಿಡಿದ ಕನ್ನಡಿ.
ಬದಲಾವಣೆ ಜಗದ ನಿಯಮ, ಆದರೆ ನಮ್ಮತನವನ್ನು ಮರೆತು ಬದಲಾಗುವುದೇಕೊ ಸರಿ ಅನ್ನಿಸುವುದಿಲ್ಲ.

Aaaah! I am sure most of you in Bangalore would have heard this, but what is "kannada barutha?" here it goes. Bangalore the IT capital of India , the silicon city and now a Metro city opened its gates to almost all kinds of people. Very evidently the recent poll census proved that there are only47% of original inhabitants in Bangalore/bengaluru.. The life style of the city has seen a gradual change with Pizza Corners replacing MTR's, classyeat out's replacing "Vidyarthi Bhavans" and flashy pub's replacing all our "Mahalakshmi wine shops"."Change is inevitable" from the days of BEML, HAL and BHEL to INFOSYS, WIPRO; Bangalore has a new look now on the world map. Gone are the days where a typical Sunday for any bangalorean was a nice romantic walk on the pavements of "LALBAGH...", "rave idli and coffee.." at the nearest yet old looking MTR and a wonderful Annavra film either at Santosh or central 'talkies'. Today's Bangalore is deluged in traffic, stress and pressure,Saturday nights without beer is desolate and a Sunday without a visit to either a nearest spa or health clinic is schlocky!! The gandhibazar's are now AC cooled super markets, majestic is now replaced by ultra modern and diversified Brigade road, sri cauvery coffee joint is now Coffee days..
and "Bhagyalakshmi coffee adda.. is now barista. With globalisation and more retail market the city will definitely see more forceful changes.Have all these changed our language? Kannada the local language of Bangalore is supposed to be one of the most meaningful language, it alsohas an unique script as compared to its other counterparts; but how many percentage of people really use Kannada in Bangalore now? The figures are staggering, only 37% of people speak kannada in the state's capital, for rest it is only "Kannada barutha?"Any normal guy starts with this sentence "Kannada barutha?" while talking to other person, people confirm before they speak the language. You want to ask an address in Bangalore ? Or reply to a question then English is the most preferred language other than Hindi.. It's a famous fact that twokannidagas in an IT company always talk in a neutral language!! even the vendors and shop keepers are channeled with this new wave, the moment when you step in any shop in Bangalore , you are always asked "Kannada barutha?" or the entire conversation takes place in non kannada languages. People have lost the confidence of speaking in the local language and more over speaking Kannada on the streets of "M.G road "or "kormangala" issubstandard. Shopping malls in the city have been completely banned from using Kannada, not a forced one but definitely an adapted one. One has to confirm that the other person knows the language before he starts using any language. "ondu glass beer" is a insult when it comes to any decorous pub in Bangalore . "Swalpa menu card kodthira..??" has been replaced by "Can I have the menu card please...?"Just to hit some facts, marathi is still the largest and common speaking language in mumbai even though mumbai has the highest no. of inhabitants.When it comes to tamil nadu, beware you can be alive either if you are a fan of rajnikanth or you know tamil. Malyalam runs in the blood of every mallu be it Kuwait , dubai or any hospital; but when it comes to kannada it is always "kannada barutha?" and next is "namaskara."

ನನ್ನ ಪ್ರೇಮ

2009-08-25T04:54:00.000-07:00

ನವಿಲು ಗರಿ ಕೆನ್ನೆ ಸವರಿದಂತೆ
ಮನದಲ್ಲಿ ನವಿರಾದ ಭಾವಗಳ ಕಂಪನ

ನನ್ನ ಪ್ರೇಮ ಸುನಾಮಿಯಂತೆ ನಿನ್ನ ಬಂದು
ಅಪ್ಪಳಿಸುವುದಿಲ್ಲ
ಆದು ಅಲೆ ತೀರದೆಡೆ ಬಂದಂತೆ ಎಂದೆಂದೂ
ಬರುವುದು ನಿನ್ನೆಡೆಗೆ

ನನ್ನ ಪ್ರೇಮ ಭೋರ್ಗೆರೆಯುವ ಮಳೆಯಂತೆ
ಸುರಿಯುವುದಿಲ್ಲ
ಅದು ಮನಕ್ಕೆ ಮುದ ಕೊಡುವ ತುಂತುರು
ಮಳೆಹನಿ

ನನ್ನ ಪ್ರೇಮ ಜ್ವರದಂತೆ ಬಂದು ಕಾಡಿ
ಹೋಗುವುದಿಲ್ಲ
ಅದು ಮ್ಯೆ ಮೇಲಿನ ಮಚ್ಚೆಯಂತೆ ಇರುವುದು
ಜೊತೆಗೆ ಕೊನೆ ತನಕ

ನನ್ನವರು

2009-07-20T02:01:00.000-07:00

ಯಾರಾದರೊಬ್ಬರೂ ನನ್ನವರೆಂದು ಹೇಳಿಕೊಳ್ಳಲಿರ ಬೇಕಿತ್ತು
ಸಮೀಪದಲ್ಲದಿದ್ದರೂ ದೂರದಲ್ಲಾದರೂ ಇರಬೇಕಿತ್ತು

ಕಣ್ಣೀರು ಕಡಲಾಗಿ ಉಕ್ಕುತ್ತಿತ್ತು ನಿದ್ರೆ ಕನಸಾಗಿತ್ತು
ತಿಂಗಳ ಬೆಳಕು ಸುಡುವ ಕೆಂಡವಾಗಿತ್ತು
ಯಾರಾದರು ಬಂದು ತಬ್ಬಿಕೊಳ್ಳ ಬೇಕಿತ್ತು
ಕರಗಿ ಹೋಗಲು ಬಾಹು ಬಂಧನ ಸಾಕಾಗಿತ್ತು

ಇಂದಲ್ಲ ನಾಳೆ ಬರುವರೆಂಬ ನಿರೀಕ್ಷೆ ಇತ್ತು
ಮುಕ್ತನಾಗಿ ಹೊಸ ಬದುಕು ನೋಡುವ ಆಸೆಯಿತ್ತು
ಜಾರುತ್ತಿರುವ ಯೌವನ ಸಮೀಪಿಸುತ್ತಿರುವ ಮುಪ್ಪಿನ
ಸುಳಿಯಲ್ಲಿ ಸಿಲುಕಿ ಕಾಯುವ ಶಕ್ತಿ ಆಸಕ್ತಿ ಉಡುಗಿದೆ

ವಿಚಿತ್ರ

2009-04-19T07:30:00.000-07:00

ಎಲ್ಲಾ ಒಟ್ಟಿಗಿರಿ ಎಂದ ದೇವರು
ನಾವು ನಮ್ಮ ಮಧ್ಯೆ ಸರಹದ್ದು
ಹಾಕಿ ಕೊಂಡೆವು

ಚಂದ್ರನ ಮೇಲೆ ಅಡಿಯಿಟ್ಟು ಬಂದೆವು
ಆದರೆ ಪಕ್ಕದ ಮನೆಗೆ ಹೋಗಿ ನಕ್ಕು
ಮಾತಾಡಲೊಲ್ಲೆವು

ಸುಂದರವಾದ ಮನೆಗಳನ್ನು ಕಟ್ಟಿ ಕೊಂಡು
ನಲಿದಾಡಿದೆವು ಆದರೆ ಮನಗಳಲ್ಲಿ
ವಿಷ ತುಂಬಿಸಿ ಕೊಂಡೆವು

ಹೇಳದೇ ಹೋದವಳಿಗೆ

2009-04-19T07:28:00.000-07:00

ನೀ ನನ್ನ ತೊರೆದು ಹೋದದ್ದು ನಾ ತಪ್ಪೆನ್ನುತ್ತಿಲ್ಲ
ಕಾರಣ ಹೇಳಿ ಹೋಗುತ್ತಿದ್ದರೆ ತಿದ್ದಿ ಕೊಳ್ಳಲು
ಅವಕಾಶವಾದರೂ ಸಿಗುತ್ತಿತ್ತು

ನಾ ಕೊಟ್ಟ ಕಾಣಿಕೆಗಳನ್ನೆಲ್ಲಾ ಮರಳಿಸಿದೆ.
ನಾ ನಿನಗೆ ತೋರಿಸಿದೆ ಪ್ರೀತಿ ನಿನಗಾಗಿ
ಕಟ್ಟಿದ ಬಣ್ಣ ಬಣ್ಣದ ಕನಸಗಳನ್ನು ಏನು ಮಾಡಿದೆ?

ಮರದ ಕೆಳಗೆ ಅಪ್ಪಿಕೊಂಡು ಕಣ್ಣೀರಾಗುತ್ತಿದ್ದಾಗ,
ಕೈ ಹಿಡಿದು ನಡೆಯತ್ತಿದ್ದಾಗು ಸಿಗುತ್ತಿದ್ದ
ನೆಮ್ಮದಿಯ ನೆನಪಾದರೂ ನಿನಗಿದೆಯಾ?

ತಪ್ಪು ನಿನ್ನದಲ್ಲ ಅದೆಲ್ಲಾ ನನ್ನದೇ
ಹಾಲಾಹಲವನ್ನು ಹಾಲೆಂದು ತಿಳಿದದ್ದು
ಮುಗ್ಢ ಮುಖ ನೋಡಿ ಮರುಳಾದದ್ದು

ನನ್ನವಳು

2009-04-19T07:27:00.001-07:00

ನಿನ್ನೆ ರಾತ್ರಿ ಹುಣ್ಣಿಮೆಯಲ್ಲ
ಆದರೂ ನನ್ನ ಮನೆಯಲ್ಲಿ ಬೆಳದಿಂಗಳಿತ್ತು
ಯಾಕೆಂದರ ಜೊತೆಗಿದ್ದೆಯಲ್ಲವೇ ನೀನು

ಮೊದಲ ಬಾರಿ ನಿನ್ನನ್ನು ನೋಡಿದಾಗ
ನಿನ್ನಲ್ಲೆ ಸೇರಿಹೋದ ಮನಸ್ಸು ನೀ ನನ್ನ
ಜೊತೆ ಸೇರಿದರೂ ಮರಳಿ ಬರಲೊಲ್ಲದು

ಜೊತೆಗೆ ಸಾಗುವ ದಾರಿಯಲ್ಲೆಲ್ಲ ಹೂವಿರಲಾರದು
ಆದರೆ ಬಾಳ ದಾರಿಯ ಸಂಗಾತಿಯಾಗಿ ನೀನಿರೆ
ಚುಚ್ಚುವ ಮುಳ್ಳಿನ ನೋವೂ ನಲಿವಿನಂತೆ

ನಗು

2009-04-08T09:51:00.000-07:00

ನಕ್ಕು ಬಿಡು ಗೆಳತಿ ಇನ್ನೊಮ್ಮೆ
ಮನ ತುಂಬಿ ನಕ್ಕು ಬಿಡು
ಎಳೆಗರುವಿನ ಕೊರಳ ಗೆಜ್ಜೆಯ
ನಾದದಂತೊಮ್ಮೆ ಕಿಲಕಿಲನೆ
ನಕ್ಕುಬಿಡು

ಮೊದಲ ಬಾರಿಗೆ ನಾ
ಕಚಗುಳಿಯಿಟ್ಟಾಗ ನಕ್ಕಂತೊಮ್ಮೆ
ನಕ್ಕು ಬಿಡು
ಮಗು ಪುಟ್ಟ ಹೆಜ್ಜೆಯಿಟ್ಟಾಗ
ಖುಶಿಯಲ್ಲಿ ಅಮ್ಮ ನಕ್ಕಂತೊಮ್ಮೆ
ನಕ್ಕು ಬಿಡು

ಹಾಲುಗಲ್ಲದ ಹಸುಳೆ ಅಮ್ಮನ
ಎದೆ ಹಾಲು ಕುಡಿದು ನಗುವಂತೊಮ್ಮೆ
ನಕ್ಕು ಬಿಡು
ನಿನ್ನ ನಿಷ್ಕಲ್ಮಶ ನಗುವ
ಕಂಡು ನಾ ನನ್ನೇ ಮರೆವಂತೊಮ್ಮೆ
ನಕ್ಕು ಬಿಡು.

ಲೋಕದ ನಿಯಮ

2009-04-04T09:13:00.002-07:00

ಈ ಲೋಕದ ನಿಯಮವೇ ಹೀಗೆ
ಆಸರೆ ಬೇಕಾದಾಗ ಆದರಿಸುವರಿಲ್ಲ
ಬೇಡವಾಗಿದಾಗ ಬಂದು ಕೇಳುವರೆಲ್ಲಾ

ಬಾಯಾರಿದವನಿಗೆ ತೊಟ್ಟು ನೀರು ಕೊಡುವರಿಲ್ಲ
ಬೇಡವಾಗಿದ್ದಾಗ ಕರೆದು ಕೊಡುವರು ಹಾಲು ಬೆಲ್ಲ
ಕಸದ ತೊಟ್ಟಿಯಲ್ಲಿನ ಅನ್ನ ತಿನ್ನುವುದನ್ನು ಕಂಡರು
ಕಾಣದಂತೆ ಸಾಗುವ ನಾವು ಜಾಣ ಕುರುಡರು

ಒಂದು ತೊಟ್ಟು ಪ್ರೀತಿಗಾಗಿ ಹಾತೊರೆಯುತ್ತಿದ್ದಾಗ
ದ್ವೇಷಿಸುವವರೆ ಸುತ್ತ ಮುತ್ತ ನಮ್ಮನ್ನೆಲ್ಲರಾಗ
ಅದೇ ನಮಗೇನಾದರು ಇನ್ನೊಬ್ಬರಿಂದ ಬೇಕಾದರೆ
ಮೂರೂ ಬಿಟ್ಟು ಹೋಗಿ ನಿಲ್ಲುವೆವರೆದುರು

ನಿರೀಕ್ಷೆ

2009-04-04T09:13:00.001-07:00

ನಿನ್ನ ದನಿ ಕೇಳಲು ಕಾದಿರುವೆ ಓ ಅಪರಿಚಿತಳೆ
ನೀನಲ್ಲಿ ನಾನಿಲ್ಲಿ ಕಳೆಯುತ್ತಿರುವೆವು ಅರ್ಥವಿಲ್ಲದ ಬಾಳು
ಭೋರ್ಗೆರುಯುತಿದೆ ಮನದಾಳದಲ್ಲಿ ಅಳಲು
ನಿಲ್ಲುವುದದು ಒಮ್ಮೆ ನೀ ನುಡಿಸೆ ಕೊಳಲು
ಕಾಡುತಿದೆ ಒಳಗೆ ಹೊರಗೆ ಕವಿದ ಕತ್ತಲು
ಓಡಿಸುವುದದ ನಿನ್ನ ನಗೆಯ ಬೆಳದಿಂಗಳು

ನಿಲುಕದ ತಾರೆಯ ಆಸೆಯಲ್ಲಿ ಚಡಪಡಿಸುತಿರೆ
ಸಂತ್ಯೆಸಲೊಂದು ಮಿಂಚು ಹುಳ ಬಂದೀತೇ
ಮನ ಬಿರುಗಾಳಿಗೆ ಸಿಲುಕಿದ ಹಾಯಿದೋಣಿ
ಜೀವ ಉಳಿಸಿ ದಡ ಸೇರಿಸುವರಾರು ಕಾಣೆ

ಜೊತೆಗೆ ನೀನಿರಬೇಕಿತ್ತು ಗೆಳತಿ

2009-01-02T09:09:00.000-08:00

ಮಾತು ಸಾಕಾದಾಗ ಮೌನವೇ ಸಂಗಾತಿಯಾದಾಗ
ಮನಸ್ಸು ಮಂಕಾದಾಗ ಚಿಲಿಪಿಲಿ ದನಿಗಳು ಕೇಳದಾದಾಗ
ಜೊತೆಗೆ ನೀನಿರಬೇಕಿತ್ತು ಗೆಳತಿ

ಹೃದಯ ಏಕಾಂತ ಸಾಕೆಂದು ಚೀರಿದಾಗ
ಆತ್ಮ ಸಂಗಾತಿ ಬೇಕೆಂದು ಬಗೆ ಬಗೆಯಾಗಿ ಕೇಳಿದಾಗ
ಜೊತೆಗೆ ನೀನಿರಬೇಕಿತ್ತು ಗೆಳತಿ

ಭಯಾನಕ ಕನಸುಗಳೇ ರಾತ್ರಿ ಸಖರಾದಾಗ
ನೀರವ ಏಕಾಂತ ನೆಮ್ಮದಿಯನ್ನು ಕಿತ್ತು ತಿನ್ನುವಾಗ
ಜೊತೆಗೆ ನೀನಿರಬೇಕಿತ್ತು ಗೆಳತಿ

ಹುಣ್ಣಿಮೆ ಚಂದ್ರ ಬಿರು ಬಿಸಿಲಾಗಿ ಸುಡುವಾಗ
ಹೊಳೆಯುವ ನಕ್ಷತ್ರಗಳು ಕಣ್ಣನ್ನು ಚೂರಿಯಾಗಿ ಚುಚ್ಚಿದಾಗ
ಜೊತೆಗೆ ನೀನಿರಬೇಕಿತ್ತು ಗೆಳತಿ

ಸುರಿಯುವ ಮಂಜು ಕೆಂಡವಾದಾಗ
ನಡೆಯುವ ಹೆಜ್ಜೆ ಜೋಲಿ ತಪ್ಪಿ ಬಿದ್ದಾಗ
ಜೊತೆಗೆ ನೀನಿರಬೇಕಿತ್ತು ಗೆಳತಿ

ಸುಂದರ ಮುಂಜಾವು ಮನಸ್ಸಲ್ಲಿ ಭಾವನೆ ಅರಳಿಸದಾಗ
ತಂಪಾದ ಸಂಜೆ ದೇಹದಲ್ಲಿ ಕಾಮನೆ ಕೆರಳಿಸದಾಗ
ಜೊತೆಗೆ ನೀನಿರಬೇಕಿತ್ತು ಗೆಳತಿ

ಕಣ್ಣೀರು ಕೋಡಿಯಾಗಿ ಹರಿದು ಗಂಟಲೊತ್ತಿ ಬಂದಾಗ
ಉಕ್ಕಿ ಬರುವ ದುಃಖದಿಂದ ಬಾಗಿಲಿ ಚಿಲಕ ಹಾಕಿದಾಗ
ಜೊತೆಗೆ ನೀನಿರಬೇಕಿತ್ತು ಗೆಳತಿ

ಮನೆ ಮನೆಗಳಲ್ಲಿ ದೀಪ ಬೆಳಗಿ ಸಂಭ್ರಮದಲ್ಲಿದ್ದಾಗ
ನನ್ನ ಮನದಲ್ಲಿ ಕಾರ್ಗತ್ತಲೆ ತುಂಬಿದ್ದಾಗ
ಜೊತೆಗೆ ನೀನಿರಬೇಕಿತ್ತು ಗೆಳತಿ

ಸುತ್ತ ಮುತ್ತ ತಂಪಾದ ವಾತಾವರಣವಿದ್ದಾಗ
ನನ್ನೊಳಗಿನ ಸುಡುವ ಬೆಂಕಿ ನೆಮ್ಮದಿ ಕಿತ್ತು ಕೊಂಡಾಗ
ಜೊತೆಗೆ ನೀನಿರಬೇಕಿತ್ತು ಗೆಳತಿ

ನಡುರಾತ್ರಿಯಲ್ಲಿ ಕಿಟಕಿಯ ಪಕ್ಕ ನೆರಳು ಸರಿದಂತಾಗಿ
ಬಾಗಿಲ ಮೇಲೆ ಕುಟ್ಟಿದ ಸದ್ದಿನ ಭ್ರಮೆಯಿಂದ ಮೈ ಬೆವತಾಗ
ಜೊತೆಗೆ ನೀನಿರಬೇಕಿತ್ತು ಗೆಳತಿ

ಕಣ್ಣಿಗೆ ಎಣ್ಣೆ ಬಿಟ್ಟಂತೆ ನಿದ್ದೆ ದೂರವಾಗಿದ್ದಾಗ
ಕ್ಷಣವೊಂದು ಯುಗವಾಗಿ ಕಳೆಯುತ್ತಿದ್ದಾಗ ಜೋಗುಳ ಹಾಡಲು
ಜೊತೆಗೆ ನೀನಿರಬೇಕಿತ್ತು ಗೆಳತಿ

ಭಾವಗಳನ್ನು ಹಾಡಾಗಿ ಹೊಮ್ಮಿಸ ಬೇಕೆಂದಿದ್ದಾಗ
ಎದೆಯ ನೋವು ಹಗುರಾಗ ಬೇಕಾದಾಗ ದನಿಗೆ ದನಿ ಸೇರಿಸಲು
ಜೊತೆಗೆ ನೀನಿರಬೇಕಿತ್ತು ಗೆಳತಿ

ಕೊರೆಯುವ ಚಳಿ ಮೈ ಮೂಳೆ ಕತ್ತರಿಸುತ್ತಿದ್ದಾಗ
ಸುರಿಯುವ ಮಳೆ ನಡುಗಿಸುತ್ತಿದ್ದಾಗ ಬೆಚ್ಚಗೆ ತಬ್ಬಿ ಕೊಳ್ಳಲು
ಜೊತೆಗೆ ನೀನಿರಬೇಕಿತ್ತು ಗೆಳತಿ

ಕೈಗೆ ಕೈ ಸೇರಿಸಿ ಜೊತೆಯಾಗಿ ನಡೆಯ ಬೇಕೆನಿಸಿದಾಗ
ತೀರದಂಚಿನಲ್ಲಿ ಕುಳಿತು ಹಾಯಿ ದೋಣಿ ನೋಡ ಬೇಕೆನಿಸಿದಾಗ
ಜೊತೆಗೆ ನೀನಿರಬೇಕಿತ್ತು ಗೆಳತಿ

ಜಗತ್ತೇ ಶೂನ್ಯವಾಗಿ ಮನ ರೋಧಿಸುತ್ತಿದ್ದಾಗ
ನಿನ್ನ ಕಾಲದಿಂಬಿನ ಮೇಲೆ ಮಲಗಿ ಶಾಂತಿಯನ್ನರಸಲು
ಜೊತೆಗೆ ನೀನಿರಬೇಕಿತ್ತು ಗೆಳತಿ

ನಾನು ಯಾಕೆ ಬರೆಯುತ್ತೇನೆ ೨

2008-12-28T12:38:00.000-08:00

ಎಲ್ಲ ಓದಲಿ ಎಂದು ನಾನು ಬರೆಯುವುದಿಲ್ಲ. ಬರೆಯುವುದು ನನ್ನ ಅನಿವಾರ್ಯ ಆಗಿದೆ. ನೆನಪು, ವಿರಹ ವೇದನೆಯನ್ನು ಹಿಡಿತದಲ್ಲಿಟ್ಟು ಕೊಳ್ಳಲು ಸಹಕಾರಿಯಾಗಿದೆ. ಎಷ್ಟೋ ಸಲ ಮನಸ್ಸು ಕೇಳುತ್ತದೆ ಅಪ್ಪ ಅಮ್ಮ ಅಲ್ಲಿ ನರಳುತ್ತಿರುವಾಗ, ಮುದ್ದಿನ ಹೆಂಡತಿ ಕಾಯುತ್ತಿರುವಾಗ ಇಲ್ಲಿರುವುದಕ್ಕೆ ಏನು ಅರ್ಥ ಎಂದು. ಆದರೆ ಅನಿವಾರ್ಯತೆಗುಳು ಸರಳ ಜೀವನವನ್ನು ಬಿಟ್ಟು ಈ ಕ್ಲಿಷ್ಟ ಜೀವನವನ್ನು ನಡೆಸುವಂತೆ ಮಾಡಿದೆ. ಈ ಮಾನಸಿಕ ತುಮುಲಗಳಿಂದ ಮುಕ್ತಿ ಪಡೆಯಲು ನಾನು ಬರೆಯುತ್ತೇನೆ. ಯಾರಾದರೂ ಓದಿ ಅವರ ನೋವನ್ನು ೨ ನಿಮಿಷ ಮರೆತರೆ ನನ್ನ ಬರವಣಿಗೆ ಸಾರ್ಥಕ.

ನಿನ್ನ ಒಲುಮೆ

2008-12-28T12:37:00.000-08:00

ಜೀವನ ನಿನ್ನ ಒಲುಮೆಯ ಸಾಗರ
ನಿನ್ನೊಂದಿಗಿನ ಮಿಲನ ಶುಭ ಆಶೀರ್ವಾದ

ಯಾವುದೋ ತೇಲಿ ಬಂದ ಸುವಾಸನೆ
ನಿನ್ನ ಸವಿ ನೆನಪು ಹೊತ್ತು ತಂದಿದೆ
ನನ್ನ ಮನಸ್ಸಿನ ಬಾಗಿಲು ಕೂಡಲೇ
ನಿನಗಾಗಿ ತೆರೆದಿದೆ

ನಿನ್ನ ಸುಮಧುರ ದನಿಯ ಮಧುರತೆಯಿಂದ
ಮ್ಯೆ ಮನ ನೆಂದು ಹೋಗಿದೆ
ನಿನ್ನೊಂದಿಗೆ ಕಳೆದ ರಸನಿಮಿಶಗಳ ಯೋಚನೆ
ತಂದಿದೆ ತುಟಿಯಂಚಿನಲ್ಲಿ ಮುಗುಳ್ನಗೆ

ಹುಚ್ಚು ಪ್ರೇಮ

2008-12-27T12:36:00.000-08:00

ಯಾರೋ ಪ್ರೇಮಿ ಅನ್ನುತ್ತಾರೆ ಇನ್ಯಾರೋ ಹುಚ್ಚ ಅನ್ನುತ್ತಾರೆ
ಆದರೆ ಭೂಮಿಯ ಬಾಯಾರಿಕೆ ಮೋಡಕ್ಕೆ ಗೊತ್ತು
ನಾನು ನಿನ್ನಿಂದ ದೂರವಿಲ್ಲ ನೀನು ನನ್ನಿಂದ ದೂರ ಇಲ್ಲ
ಇದು ನನ್ನ ನಿನ್ನ ಹ್ರದಯಕ್ಕೇ ಗೊತ್ತು

ಪ್ರೇಮ ಒಂದು ಪವಿತ್ರವಾದ ಮಂತ್ರ
ಯಾವಾಗಲೋ ಕಬೀರ ಪ್ರೇಮಿ ಇನ್ಯಾವಗಲೋ ಮೀರಾ
ಇಲ್ಲರೂ ಹೇಳುತ್ತಾರೆ ನನ್ನ ಕಣ್ಣಂಚಿನಲ್ಲಿ ನೀರಿದೆ
ಅದು ಮುತ್ತು ನೀನು ಅರ್ಥ ಮಾಡಿಕೊಂಡರೆ ಇಲ್ಲ ಕೇವಲ ನೀರು

ಸಾಗರದಲ್ಲಿ ನೀರೆಷ್ಟಿದ್ದರೂ ಅದಕ್ಕೆ ಅಳಲು ಸಾಧ್ಯವಿಲ್ಲ
ಭೂಮಿಯ ಮೇಲೆ ಬಿದ್ದ ಮಂಜು ಭೂಮಿಗೆ ಉಳಿಯುವುದೆಲ್ಲ
ನಾನೆಲ್ಲರಿಗೆಷ್ಟು ಆತ್ಮೀಯನಾಗಿದ್ದರೂ ನೀನಿಲ್ಲದೆ ಕಳೆಯುವ
ಪ್ರತೀ ನಿಮಿಷ ಯುಗದಂತೆ ಕಳೆಯುವುದು

ಈ ನೆಲದಿಂದ ಆಕಾಶದವರೆಗೆ ಎರಡೇ ಅಧ್ಬುತ ವಿಷಯ
ಒಂದು ನಿನ್ನ ಮುಗ್ಧತೆ ಇನ್ನೊಂದು ನನ್ನ ಹುಚ್ಚು ಪ್ರೇಮ
ನಿನ್ನ ಹೆಸರಿನೊಂದಿಗೆ ಪ್ರತೀ ಕ್ಷಣ ಜೀವಿಸುತ್ತಿರುವ ನನಗೆ
ಅದರೊಂದಿಗೇ ಎಂದೆಂದೂ ಬಾಳುವ ಆಸೆ

ಪ್ರಿಯತಮೆ

2008-12-20T11:50:00.000-08:00

ಮನದಲ್ಲಿ ಪ್ರೀತಿಯಿರೆ ಈ ಪ್ರಪಂಚವೇ ಸ್ವರ್ಗವು
ಮನದಲ್ಲಿ ಪ್ರಿಯತಮೆಯಿರೆ ಜಗವೆಲ್ಲಾ ಮನೋಹರ

ಪ್ರೀತಿಗೇ ಪ್ರೀತಿ ಕಲಿಸಿದವಲು ನೀನು
ನಿನ್ನೊಂದು ಕುಡಿನೋಟದಿಂದ ಜೀವನ ಪಾವನ

ಹಂಸಕ್ಕೇ ನಡಿಗೆ ಕಲಿಸಿದವಳು ನೀನು
ನೀ ಕಣ್ಣೆತ್ತಿ ನೋಡಿದರೆ ಮಲ್ಲಿಗೆ ಮೊಗ್ಗೂ ನಾಚುವುದು

ನವಿಲೆಗೇ ನಾಟ್ಯ ಕಲಿಸಿದವಳು ನೀನು
ನಿನ್ನೊಂದು ಮುಗುಳ್ನಗೆಯಿಂದ ಮನ ಅಲ್ಲೋಲ ಕಲ್ಲೋಲ

ಇನ್ನೂ ನೆನಪಿದೆ

2008-12-20T11:48:00.000-08:00

ಕದ್ದು ಮುಚ್ಚಿ ರಾತ್ರಿ ಹಗಲು
ರೋದಿಸುತ್ತಿದ್ದದ್ದಿನ್ನೂ ನೆನಪಿದೆ
ಇಂದಿಗೂ ಆ ನಮ್ಮ ಪ್ರೀತಿಯ ಯುಗದ ನೆನಪಿದೆ

ನಿನ್ನ ಸೆರಗಿನ ಕೊನೆ ಹಿಡಿದು ನಾನೆಳೆಯುತಿರೆ
ಅಂಗೈಯಲ್ಲಿ ಮುಖ ಮುಚ್ಚಿ ನೀ ನಾಚುತ್ತಿದ್ದದ್ದಿನ್ನೂ ನೆನಪಿದೆ
ಬಿರು ಬಿಸಿಲಿನಲ್ಲಿ ನನ್ನನ್ನು ಹುಡುಕಿಕೊಂಡು
ಬರೆಗಾಲಲ್ಲಿ ನೀನು ಬರುತ್ತಿದ್ದದ್ದಿನ್ನೂ ನೆನಪಿದೆ

ನನ್ನನ್ನು ನೋಡಿಕೊಂಡು ನಿನ್ನನ್ನು ನೀನು ಮರೆತು
ಎದೆ ತುಂಬಿ ಹಾಡುತ್ತಿದ್ದದ್ದಿನ್ನೂ ನೆನಪಿದೆ

ದೂರವಾಗಲೇ ಬೇಕಾದ ಆ ಹೊತ್ತಿನಲ್ಲಿ
ನೀನತ್ತು ನನ್ನನಳಿಸಿ ಕಳಿಸಿದ್ದಿನ್ನೂ ನೆನಪಿದೆ

ನಾನು ಯಾಕೆ ಬರೆಯುತ್ತೇನೆ

2008-11-21T12:17:00.000-08:00

ಬಾಲ್ಯದಿಂದಲೂ ನಾನು ಕಂಡು ಕೊಂಡ ಉತ್ತಮ ಸಂಗಾತಿ ಎಂದರೆ ಓದು.
ಓರಗೆಯ ಗೆಳೆಯರೆಲ್ಲಾ ಬೇರೆ ಬೇರೆ ರೀತಿಯ ಮನೋರಂಜನೆಯ ಮಾರ್ಗ ಆರಿಸಿಕೊಂಡಾಗ ನನಗೆ ಇಷ್ಟವಾಗುತ್ತಿದ್ದದ್ದು ಕಥೆ, ಕಾದಂಬರಿಗಳು. ಗೆಳೆಯರು ಬಣ್ಣ ಬಣ್ಣದ ಕನಸು ಕಟ್ಟುತ್ತಿದ್ದರೆ, ನನಗೆ ಬರುತ್ತಿದ್ದ ಕನಸು ಹೊಟ್ಟೆ ತುಂಬಾ ಊಟ ಮಾಡಿದಂತೆ. ಯಾರಿಗೆ ಏನು ಕೊರತೆ ಇದೆಯೋ ಅದು ಕನಸಿನ ರೂಪದಲ್ಲಿ ಬರುತ್ತದಂತೆ.
ಆ ಕಾಲದಿಂದಲೂ ನನ್ನನ್ನು ನಾನಾಗಿ ಬದುಕಲು, ಬೆಳೆಯಲು ಅನುವು ಮಾಡಿ ಕೊಟ್ಟದ್ದು ಕಥೆ ಪುಸ್ತಕಗಳು.
ಏನಾದರೂ ಬರೆಯ ಬೇಕೆಂಬ ತುಡಿತ ತುಂಬಾ ದಿನದಿಂದ ಕಾಡುತ್ತಿತ್ತು. ಯಾಕೋ ಏಕಾಗ್ರತೆ ಬರುತ್ತಿರಲಿಲ್ಲ. ೩ ತಿಂಗಳಿಂದ ನನ್ನದಲ್ಲದ ದೇಶದಲ್ಲಿ ಹೊಟ್ಟೆ ಪಾಡಿಗಾಗಿ ದುಡಿಯುತ್ತಿದ್ದೇನೆ.
ಜೀವನದಲ್ಲಿ ಅನುಭವಿಸಿದ ಒಳಿತು, ಕೆಡುಕುಗಳನ್ನು ಕಥೆ ಕವನದ ರೂಪದಲ್ಲಿ ತೋಡಿ ಕೊಳ್ಳುತ್ತಿದ್ದೇನೆ. ನಿಮ್ಮ ಅನುಭವಗಳನ್ನು ದಯವಿಟ್ಟು ಹಂಚಿಕೊಳ್ಳಿ. ಆದರೆ ಒಂದು ಕೋರಿಕೆ ಯಾರ ಮನಸ್ಸಿಗೂ ನೋವಾಗುವಂತೆ ಬರೆಯಬೇಡಿ. ಓದು ಮನಸ್ಸಿಗೆ ಮುದ ಕೊಟ್ಟರೆ ಅಥವಾ ಇನ್ನೂ ಚೆನ್ನಾಗಿ ಬರೆಯ ಬಹುದೆನಿಸಿದರೆ ಬಿಚ್ಚು ಮನಸ್ಸಿನಿಂದ ತಿಳಿಸಿ.

ಪ್ರೀತಿಯಿಂದ
ಪ್ರಶಾಂತ

ನನ್ನ ಮನಸ್ಸು

2008-11-21T12:16:00.000-08:00

ನನ್ನ ಕಣ್ಣೀರು ಮಳೆಯಾಗಿ ಹರಿದರೂ
ಮನದಲ್ಲಿ ಇನ್ನೂ ಇಂಗದ ಬಾಯಾರಿಕೆ

ಈ ಹ್ರದಯ ಬುದ್ದಿಯ ಮಾತು ಕೇಳುತ್ತಿಲ್ಲ
ಯಾರೋ ಗಂಟಲೊತ್ತಿ ಹಿಡಿದರೆ
ಹಾಡು ತುಟಿಯಿಂದ ಹೇಗೆ ಹೊಮ್ಮೀತು
ಪ್ರತೀಕ್ಶಣ ನೀನು ಬರುವೆಯೆಂಬ ಸುಳ್ಳು
ಭರವಸೆಯಲ್ಲಿ ದಿನ ಕಳೆಯುತ್ತಿದೆ

ವರುಷಗಳೇ ಕಳೆದು ಹೋದವು ನಾವಿಬ್ಬರಗಲಿ
ಕೋಲ್ಮಿಂಚು ಬಾನಲ್ಲಿ ಹೊಳೆದು ಮರೆಯಾದಂತೆ
ಕಳೆದು ಹೋದೆ.
ಮನಸ್ಸು ಕಣ್ಣು ಮುಚ್ಚಾಲೆ ಆಟ ಅಡುತ್ತಿದೆ
ನಿನ್ನ ನೆನಪಿನೊಂದಿಗೆ

ನನ್ನ ನೆನಪು

2008-11-21T12:15:00.001-08:00

ನನ್ನ ಚಿತ್ರವನ್ನು ಕಣ್ಣಿನಿಂದ ಮರೆಮಾಚಿ
ಮನಸ್ಸಿನಿಂದ ಅಳಿಸಲಾಗದೆ ಒದ್ದಾಡುತ್ತಿರುವೆ
ನನಗೇಕೊ ಅಚಲವಾದ ನಂಬಿಕೆ
ನೀ ನನ್ನನ್ನೆಂದೂ ಮರೆಯಲಾರೆ

ಎಲ್ಲಿ ಹೋದರೂ ನನ್ನ ನೆನಪು ನಿನ್ನ ಕಾಡುತ್ತದೆ
ಒಮ್ಮೆ ಕಣ್ಣೀರಾಗಿ ಮತ್ತೊಮ್ಮೆ ಬಿಕ್ಕಳಿಕೆಯಾಗಿ
ನಾನು ಪ್ರೀತಿಯೆಂಬ ಎಣ್ಣೆ ಹಾಕಿ ಉರಿಸಿದ ಹಣತೆ
ನೀನೆಂದೂ ನಂದಿಸಲಾರೆ

ಮಾತಿನ ಮಧ್ಯೆ ನನ್ನ ಹೆಸರು ನುಸುಳಲು
ನಿನ್ನ ಹ್ರದಯ ವಿಲಿವಿಲಿ ಒದ್ದಾಡುತ್ತದೆ
ವಿವಶತೆಯ ಕಾರಣ ಏನೆಂದು ಕೇಳಿದರೆ
ನೀನೆಂದೂ ಹೇಳಲಾರೆ

ನಿನ್ನ ಆಗಮನ

2008-11-21T12:14:00.001-08:00

ಒಡಲು ಹಸಿದವನಿಗೆ ಅನ್ನದಂತೆ
ಮರುಭೂಮಿಯಲ್ಲಿ ನೀರಿನಂತೆ
ಚಳಿಯಿಂದ ನಡುಗುತ್ತಿದ್ದವನಿಗೆ ಕಂಬಳಿಯಂತೆ
ಕತ್ತಲು ಆವರಿಸಿದ್ದ ಕಾಡಿಗೆ ಬೆಳ್ಳಿ ಕಿರಣದಂತೆ
ದಿಕ್ಕು ತಪ್ಪಿದ್ದ ನೌಕೆಗೆ ಕಡಲ ತೀರದಂತೆ
ಬಿದ್ದಳುತ್ತಿದ್ದ ಮಗುವಿನ ಬಳಿಗೆ ಅಮ್ಮನಂತೆ

ನನ್ನ ಹುಡುಗಿಗಾಗಿ

2008-11-21T12:11:00.000-08:00

ಯಾವಾಗಲೊಮ್ಮೆ ಕನಸುಗಳ ಜೊತೆ ಕಳೆದು ಹೋಗುತ್ತೇನೆ
ನಿನ್ನನ್ನು ಕನಸುಗಳಲ್ಲಿ ಹುಡುಕುತ್ತಾ ಮತ್ತೊಮ್ಮೆ ಕಳೆದು ಹೋಗುತ್ತೇನೆ
ಒಬ್ಬಂಟಿ ಅನ್ನಿಸಿದಾಗೆಲ್ಲಾ ನಿನ್ನೊಂದಿಗೆ ಕಳೆದ ಮಧುರ ಕ್ಷಣಗಳೇ ಸಂಗಾತಿ ನನಗೆ
ನಿನ್ನ ನೆನಪು ಯಾವಾಗಲೂ ಏಕಾಂಗಿಯಾಗಿರಲು ಬಿಡಲಿಲ್ಲ

ಇರುವೆ ಲಕ್ಷಾಂತರ ಗಾವುದ ದೂರ ಆದರೆ ಮನಸ್ಸಿಗೆ ತುಂಬಾ ಹತ್ತಿರವಿರುವೆ
ಪ್ರತೀ ಎದೆ ಬಡಿತದಲ್ಲಿ ಇನ್ನೂ ನನ್ನ ಹತ್ತಿರ ಬರುವೆ

ಯಾವುದೇ ಶರತ್ತು ನಾನಿಟ್ಟುಕೊಂಡಿಲ್ಲ ಪ್ರೀತಿಯಲ್ಲಿ ಆದರೆ
ಪ್ರಾಣಕ್ಕಿಂತ ಹೆಚ್ಚಾಗಿ ನಿನ್ನಿನ್ನು ಪ್ರೀತಿಸುತ್ತೇನೆ ಅಷ್ಟೆ

ಒಂದು ತಿರುವಿನಲ್ಲಿ ನನಗಾಗಿ ಕಾಯುತ್ತಿರುವೆ ಎಂದು ಭಾಷೆ ನೀಡಿದ್ದೆ
ಅದಕ್ಕಾಗಿ ಪ್ರತೀ ತಿರುವಿನಲ್ಲಿ ನಗುತ್ತ ಮುಂದೆ ಸಾಗುತ್ತಿರುವೆ

ಈ ಕಣ್ಣೀರಿಗೆ ನಿನ್ನ ಮೇಲೆ ಯಾವುದೇ ಆಪಾದನೆ ಇಲ್ಲ
ಹಾಗೇ ನಿನ್ನ ನೆನಪಾದಗೆಲ್ಲಾ ಸಂತೋಷದಿಂದ ಹೊಮ್ಮುತ್ತದೆ

ಬದುಕಿದ್ದೂ ಸತ್ತವರು

2008-10-20T09:38:00.000-07:00

ನನಗಾಗ ಹೆಚ್ಚುಕಮ್ಮಿ ೧೦ ವರ್ಷ. ಒಂದು ದಿನ ದೇವಾಲಯದಲ್ಲಿ ಭಜನೆ ಮುಗಿಸಿ ಮನೆ ಕಡೆಗೆ ಬರುತ್ತಿದ್ದೆ.ಗೆಳೆಯ ವಿಠಲ ಅವತ್ಥು ಜೊತೆಗಿರಲಿಲ್ಲ.
ಹಿಂದಿನ ದಿನ ರಾತ್ರಿ ಯಾರೋ ಭೂತದ ಬಗ್ಗೆ ಮಾತಾಡುವುದನ್ನು ಕೇಳಿಸಿಕೊಂಡದ್ದಕ್ಕೋ ಏನೋ ಸಿಕ್ಕಾಪಟ್ಟೆ ಹೆದರಿಕೊಂಡು ಬೇಗ ಬೇಗ ಹೆಜ್ಜೆ ಹಾಕುತ್ತಿದ್ದೆ.
ಅಷ್ಟರಲ್ಲಿ ಯಾರೋ ಮಾಣಿ ಇಲ್ಲಿ ಬನ್ನಿ ಎಂದು ಹಿಂದಿನಿಂದ ಕರೆದರು. ನೋಡಿದರೆ ನಮ್ಮ ಮನೆಗೆ ಕೆಲಸಕ್ಕೆ ಬರುವ ಬೊಗ್ರ.
ಸ್ವ್ಲಲ್ಪ ಬೊಗ್ರನ ಬಗ್ಗೆ ಹೇಳಿ ಮತ್ತೆ ಕಥೆ ಮುಂದುವರಿಸೋಣ. ತುಂಬಾ ಸಾಧು ಮನುಷ್ಯ ನಮ್ಮ ಬೊಗ್ರ. ಬೆಳಿಗ್ಗೆ ೮ ಘಂಟೆಗೆ ಬಂದರೆ ಸಾಯಂಕಾಲ ೬ ಘಂಟೆತವರೆಗೆ ಗದ್ದೆ, ತೋಟದ ಕೆಲಸ ಮಾಡುತ್ತಾನೆ.ಒಮ್ಮೆಗೆ ೦.೫ ಕೇಜಿ ಅನ್ನ ತಿನ್ನುತ್ತಾನೆ. ಅಜ್ಜಿ ಹೇಳುತ್ತಿದ್ದರು ಇವನಿಗೆ ಅನ್ನ ಬೇಯಿಸಿ ನಾನು ಬೇಗ ಮುದುಕಿಯಾದೆನೆಂದು.ನಾನೆಂದರೆ ಬೊಗ್ರನಿಗೆ ತುಂಬಾ ಪ್ರೀತಿ. ನನಗೆ ಕಥೆ ಹೇಳುತ್ತಾ, ಹೊಳೆ ಬದಿಗೆ ಕರೆದು ಕೊಂಡು ಹೋಗಿ ಅಲ್ಲಿ ಸಿಗುವ ಹಣ್ಣು ತಿನ್ನಿಸುತ್ತಿದ್ದ.
ಸರಿ ಮರಳಿ ನಮ್ಮ ಮುಖ್ಯವಾಹಿನಿಗೆ ಮರಳಿ ಬರೋಣ. ಬೊಗ್ರ ಕರೆದ ಎಂದು ಹತ್ತಿರ ಹೋದರೆ, ಬೊಗ್ರನಲ್ಲಿ ಏನೋ ನನಗೆ ಗುರಿತಸಲಾಗದ ವ್ಯತ್ಯಾಸ. ಮಾತು ತೊದಲುತ್ತಿದೆ, ಏನೋ ಕೆಟ್ಟ ವಾಸನೆ ಬಾಯಿಯಿಂದ.ಮಾಣಿ ಯಾರಿಗೂ ಹೇಳಬೇಡ. ನಾನು ನಾಳೆ ರಂಗ ಶೆಟ್ರನ್ನು ಕೊಂದು ಹಾಕುತ್ತೇನೆ. ಅವರಿಗೆ ಸುಖ ಕೊಡಲು ದಿನಾ ನನ್ನ ಹೆಂಡತಿಯೇ ಬೇಕು. ಅದೂ ನನ್ನ ಹತ್ರನೇ ಅವಳ ಸೌಂದರ್ಯವನ್ನು ಹೊಗಳುತ್ತಾರೆ.ದುಡ್ಡಿದ್ದರೆ ಏನೊ ಮಡಬಹುದೂಂತ ತಿಳಿದಿದ್ದಾರೆ. ನಾಳೆ ತೋರಿಸುತ್ತೇನೆ ಇವರಿಗೆ ನಾನು ಯಾರೆಂದು. ಅಷ್ಟರಲ್ಲಿ ನಾನು ಹೆದರಿ ಅಲ್ಲಿಂದ ಮನೆಗೆ ಓಡಿ ಬಂದೆ.
ಅಮ್ಮನಿಗೆ ವಿಷಯ ಹೇಳುವವರೆಗೆ ಸಮಾಧಾನವಿರಲಿಲ್ಲ. ಏ ಸುಮ್ಮನಿರು ಅವನು ಕುಡಿದು ಏನೇನೋ ಮತಾಡುತ್ತಾನೆ. ಅದನ್ನು ಇನ್ನು ಯಾರಿಗೂ ಹೇಳಬೇಡ ಎಂದು ಅಮ್ಮ ಸ್ವಲ್ಪ ಜೋರಾಗಿಯೇ ನನ್ನನ್ನು ಗದರಿದರು.
ನನಗೆ ಯಾವಾಗ ಬೆಳಗಾಗುತ್ತದೆ, ಬೊಗ್ರ ಏನು ಮಡುತ್ತಾನೋ ಎಂಬ ಕಾತುರ. ನನ್ನ ಗೆಳೆಯ ವಿಠಲನೊಡನೆ ಬೊಗ್ರನ ಸಂಭಾಷಣೆಯ ಬಗ್ಗೆ ಹೇಳಿ ಅದರ ವಿವರಣೆ ಕೇಳಿದೆ. ಅವನಿಗೂ ಬೊಗ್ರನ ಮಾತು ಅರ್ಥವಾಗಲಿಲ್ಲ.
ಆದರೆ ಬೆಳಿಗ್ಗೆ ಏನೂ ನಡೆಯಲೇ ಇಲ್ಲ. ಅದೇ ದೇವಾಲಯದ ಬಳಿ ಬೊಗ್ರ, ರಂಗ ಶೆಟ್ರ ಮುಂದೆ ಕೈ ಕಟ್ಟಿ ನಿಂತಿದ್ದ. ಅವರು ಏನೋ ಹೇಳುತ್ತಿದ್ದರೆ ಸರಿ ಸ್ವಾಮಿ ಎಂದು ತಲೆ ಆಡಿಸುತ್ತಿದ್ದ. ನನಗೆ ಆಶ್ಚರ್ಯವಾಯಿತು. ಇದೇ ಬೊಗ್ರ ನಿನ್ನೆ ಶೆಟ್ರನ್ನು ಕೊಂದ್ಯು ಹಾಕುವ ಬಗ್ಗೆ ಮಾತಡುತ್ತಿದ್ದ. ಇಂದು ನೋಡಿದರೆ ಸುಮ್ಮನಿದ್ದಾನೆ. ನನಗೆ ಏನೂ ಅರ್ಥವಾಗಲಿಲ್ಲ. ಅಮ್ಮ ಅವನ ಬಗ್ಗೆ ಹೇಳಿದ್ದು ಸರಿ ಅನ್ನಿಸಿತು.
ಸ್ವಲ್ಪ ವರ್ಷ ಕಳೆದ ಮೇಲೆ ನನಗೆ ತಿಳಿಯಿತು ಬೊಗ್ರನ ಮಾತಿನ ಅರ್ಥ. ಅವನ ದುಸ್ಠಿತಿಯ ಬಗ್ಗೆ ಅನುಕಂಪ ಮೂಡಿತು.
ಇದೆಲ್ಲ ಆದದ್ದು ೨೫ ವರ್ಷಗಲ ಹಿಂದೆ. ಕಾಲ ಮತ್ತು ಸಮುದ್ರದ ಅಲೆಗಳು ಯಾರನ್ನು ಕಾಯುವುದಿಲ್ಲ. ನಾನು ವಿದ್ಯಾಭ್ಯಾಸ ಮುಗಿಸಿ ಕೆಲಸಕ್ಕೆ ಬೆಂಗಳೂರಿಗೆ ಬಂದೆ. ನನ್ನದೇ ಆದ ಯಾಂತ್ರಿಕ ಜೀವನದಲ್ಲಿ ಬೊಗ್ರ, ಊರು, ಶೆಟ್ರು ಎಲ್ಲಾ ನೆನಪು ಮಸುಕಾಗಿ ಹೋಯಿತು. ಅಮ್ಮನಿಗೆ ಫೋನ್ ಮಾಡಿದಾಗ ಒಮ್ಮೆ ಹೇಳಿದ್ದರು, ಬೊಗ್ರ ಇಹಲೋಕದ ವ್ಯಾಪಾರ ಮುಗಿಸಿದ ಎಂದು. ಅಮ್ಮ ಬೆಂಗಳೂರಿಗೆ ಬಂದ ಮೇಲಂತೂ ಊರಿನ ಸುದ್ದಿ ಹೇಳುವವರು ಯಾರೂ ಇಲ್ಲ.
ಕಳೆದ ಸಲ ಊರಿಗೆ ಅಮ್ಮನನ್ನು ಕರೆದು ಕೊಂಡು ಹೋಗಿದ್ದಾಗ ಯಾರೋ ಮುದುಕ ತುಂಬಾ ಕಷ್ಟ ಪಟ್ಟು ನಡೆದು ಕೊಂಡು ಅದೇ ದೇವಾಲಯದ ಬಳಿ ಹೋಗುತ್ತಿದ್ದ. ಒಂದು ಕಣ್ಣು ಬೇರೆ ಇರಲಿಲ್ಲ ಆ ಮನುಷ್ಯನಿಗೆ.ನನ್ನನ್ನು ನೋಡಿ ನಮಸ್ಕಾರ ಭಟ್ರೆ ಅಂದ. ನೋಡಿದರೆ ಅದೇ ರಂಗ ಶೆಟ್ರು. ಯಾಕೊ ಯಮನಿಗೆ ಇನ್ನು ಕರುಣೆ ಬಂದಿಲ್ಲ ಭಟ್ರೆ ನನ್ನನ್ನು ಇನ್ನೂ ಇಲ್ಲಿಯೇ ಇಟ್ಟು ನರಳಿಸುತ್ತಿದ್ದಾನೆ ಅಂದು ಅತ್ತೇ ಬಿಟ್ಟರು. ಅವರಿಗೆ ಎಲ್ಲಾ ರೀತಿಯ ಖಾಯಿಲೆಗಳು. ಹೆಂಡತಿ ಇವರ ಲೀಲೆಗಳನ್ನು ನೋಡಲಾರದೆ ತುಂಬಾ ವರ್ಷಗಳ ಹಿಂದೆಯೇ ಅತ್ಮಹತ್ಯೆ ಮಾಡಿಕೊಂಡಿದ್ದರು. ವ್ರದ್ದಾಪ್ಯದಲ್ಲಿ ಯಾರೂ ಇಲ್ಲ ಬಳಿಯಲ್ಲಿ.
ಯಾಕೋ ಒಮ್ಮೆಲೆ ನನಗೆ ಬೊಗ್ರನ ನೆನಪಾಯಿತು. ದೇವರು ಇವರನ್ನು ನರಳಿಸಲೋಸ್ಕರ ಅವನ ಕ್ಯೆಯಲ್ಲಿ ಶೆಟ್ರ ಕೊಲೆ ಮಾಡಿಸಲಿಲ್ಲವೇನೋ?

ಆಂತರ್ಯ

2008-10-20T09:36:00.000-07:00

ರಾಮಾ ಭಟ್ರು ಪ್ರಸನ್ನ ವದನರಾಗಿಯೇ ದೇವಾಲಯದ ಪ್ರಾಂಗಣದಲ್ಲಿ ನೆಡೆದುಕೊಂಡು ಹೋಗುತ್ತಿದ್ದರು. ಆವತ್ತು ಜಯಶೆಟ್ರು ಮತ್ತು ಕುಟುಂಬದವರ ವಿಶೇಷ ಪೂಜೆ ನಡೆದಿತ್ತು.ದಕ್ಷಿಣೆ, ಮಂಗಳಾರತಿ ತಟ್ಟೆ ಎಲ್ಲಾ ಭರ್ಜರಿಯಾಗಿಯೇ ತುಂಬಿತ್ತು. ಹಾಗಾಗಿ ಮ೦ದಹಾಸ ಮುಖದಲ್ಲಿ ತುಂಬಿ ತುಳುಕುತ್ತಿತ್ತು.ಅಷ್ತರಲ್ಲಿ ರಸಾಭಾಸ. ಕಸಗುಡಿಸುವ ಕೀಳು ಜಾತಿಯ ಗುಲ್ಲಿಯ ೩ ವರ್ಷದ ಮಗ ಸೇಕರ ಓಡಿಬಂದು ಭಟ್ಟರನ್ನು ಮುಟ್ಟಿಬಿಟ್ಟ. ಅಯ್ಯೋ ಅಪಶಕುನ ಮುಂಡೇದೆ ಎಂದು ಬ್ಯೆಯತ್ತಾ ಭಟ್ಟರು ಸ್ನಾನ ಮಾಡಲು ಬಾವಿ ಕಟ್ಟೆಗೆ ನಡೆದರು. ಬಿಡಿ ಭಟ್ರೆ ನಿಮ್ದೇ ಮಗ ಅಲ್ವ ಯಾಕೆ ಅಷ್ಟು ಕೋಪ ಎಂದು ಗುಲ್ಲಿ ರಾಗವಾಗಿ ನುಡಿದಾಗ ಭಟ್ರು ಹೆದರಿ ಅತ್ತಿತ್ತ ನೋಡಿದರು. ಯಾರೂ ಇಲ್ಲ ಬಿಡಿ ನೋಡಿಕೊಂಡೇ ಹೇಳಿದ್ದು ಎಂದು ಗುಲ್ಲಿ ವ್ಯೆಯಾರದಿ ನುಡಿಯಲು ಭಟ್ರು ಉತ್ತರಿಸದೆ ಮುನ್ನಡೆದರು.
ಅಮ್ಮನಿಗೆ ಸಾಯುವಾಗ ಕೊಟ್ಟ ಭಾಷೆಯಂತೆ ಸೋದರ ಮಾವನ ಮಗಳು ಜಾನಕಿಯನ್ನೇ ಮದುವೆಯಾಗಿದ್ದರು ರಾಮಾ ಭಟ್ರು ೪ ವರ್ಷದ ಹಿಂದೆ. ಆದರೆ ಪ್ರಥಮ ರಾತ್ರಿಯೇ ತಿಳಿದು ಹೋಯಿತು ಭಟ್ರಿಗೆ ತನ್ನ ರಸಿಕತೆ ಹೆಂಡತಿಗೆ ಅರ್ಥವಾಗುವುದಿಲ್ಲವೆಂದು. ತಿಂಗಳಿಗೆ ೨೦ ದಿನ ವ್ರತ ಇನ್ನೂ ಹತ್ತು ದಿನ ಬೇರೆ ಕಾರಣದಿಂದ ಜಾನಕಿ ಭಟ್ರಿಗೆ ಸಹಕರಿಸುವುದಿಲ್ಲ. ಸ್ವಭಾವತ ಸಾಧು ಮನುಷ್ಯ ನಮ್ಮ ಭಟ್ರು. ಹಾಗಾಗಿ ಹೆಂಡತಿಯನ್ನು ಜೋರು ಮಾಡಲಾರರು. ಸೋದರ ಮಾವನ ೧೦ ಎಕರೆಯ ಜಮೀನೂ ಕಾರಣವಿದ್ದಿತೊ ಏನೊ?
ಆಸೆಯ ಕಣ್ಣಿನಿಂದ ಕಡೆದ ವಿಗ್ರಹದಂತಿದ್ದ ಗುಲ್ಲಿಯನ್ನೇ ನೋಡುತ್ತಿದ್ದರು ನಮ್ಮ ಕಥಾನಾಯಕ ಭಟ್ರು ಒಂದು ದಿನ. ಜಾಣೆ ಗುಲ್ಲಿಗೆ ಅರಿವಾಯಿತು ಭಟ್ರ ಬಯಕೆ. ಗುಲ್ಲಿಯ ಗಂಡ ರಾಘು ನೀರಿಗಿಂತಲೂ ಶರಾಬು ಜಾಸ್ತಿ ಕುಡಿಯುತ್ತಾನೆ. ಗುಲ್ಲಿಗೂ ಏರು ಯೌವನದ ಬಯಕೆ. ರಾಘು ಮನೆಗೆ ಬರುವುದೇ ಅಪರೂಪ. ಹಾಗೆ ಗುಲ್ಲಿಗೂ ಭಟ್ರ ಬಯಕೆ ತಪ್ಪಾಗಿ ಕಾಣಲಿಲ್ಲ.ಆವತ್ತು ಸಾಯಂಕಾಲವೇ ದೇವಾಲಯದ ಅಡುಗೆ ಕೋಣೆಯಲ್ಲಿ ಸುರುವಾಯಿತು ಭಟ್ರ ಪ್ರೇಮಪಾಠ. ಅದರ ಫಲವೇ ಸೇಖರ. ಬೆಳ್ಳಗೆ ಮುದ್ದಾಗಿದ್ದ ಮಗು ಕೇರಿಯಲ್ಲಿ ಎಲ್ಲರಿಗೂ ಅಚ್ಚುಮೆಚ್ಚು.
ಇತ್ತೀಚೆಗೇಕೊ ಭಟ್ರಿಗೆ ಗುಲ್ಲಿಯ ಮೇಲೆ ಅನುಮಾನ. ನಿನ್ನೆ ಹೇಳುತ್ತಿದ್ದಳು ಸೇಕರ ನಿಮ್ಮ ಹಾಗೇ ನಗುತ್ತಾನೆ ಎಂದು. ಎಲ್ಲಾದರು ಇವಳು ಬಾಯಿ ಬಿಟ್ಟರೆ ಮರ್ಯಾದೆ ಹರಾಜಾಗುತ್ತದೆ. ಜಾತಿಯಿಂದ ಬಹಿಷ್ಕಾರವಾಗಬಹುದು. ಆದರೆ ಕತ್ತಲಾಗುತ್ತಿದ್ದಂತೆ ಮನವೆಂಬ ಮರ್ಕಟ ಸುಖ ಅರಸಿಕೊಂಡು ಹೋಗಲೇ ಬೇಕೆಂದು ಒತ್ತಾಯಿಸುತ್ತದೆ. ಈಗೀಗ ಭಟ್ರು ಗುಲ್ಲಿಯ ಮೇಲೆ ಸ್ವಲ್ಪ ರೇಗುತ್ತಾರೆ. ಒಂದೆರಡು ಸಲ ಗುಲ್ಲಿ ಇಲ್ಲ ಒಡೆಯ ನಿಮಗೆಂದಿಗೂ ಮೋಸ ಮಡುವುದಿಲ್ಲ ಎಂದು ಅತ್ತದ್ದೂ ಇದೆ. ಆದರೂ ಭಟ್ರಿಗೆ ಸುಖ ನಿದ್ದೆ ಇಲ್ಲ ಹೆದರಿಕೆಯಲ್ಲಿ.
ರಮೇಶ ಪಿ.ಯು.ಸಿ ಕಲಿತು ಪಟ್ತಣದಲ್ಲಿ ಕೆಲಸಕ್ಕಿದ್ದಾನೆ. ಅವನಿಗೆ ತನ್ನ ಜಾತಿಯವರಿಗೆ ದೇವಾಲಯಕ್ಕೆ ಪ್ರವೇಶ ಕೊಡಿಸ ಬೇಕೆಂಬ ಹಂಬಲ. ಪಡ್ಡೆ ಹುಡುಗರ ಸಹಕಾರ ಬೇರೆ ಇದೆ. ಒಂದೂ ದಿನ ಬೆಳಿಗ್ಗೆ ಗುಂಪು ದೇವಾಲಯಕ್ಕೆ ಬ೦ದೇ ಬಿಡುತ್ತದೆ. ದಯವಿಟ್ಟು ದೇವಾಲಯದ ಒಳಗೆ ಬರಬೇಡಿ ಅಪವಿತ್ರವಾಗಿ ಊರಿಗೆ ಒಳ್ಳೆಯದಾಗಲಿಕ್ಕಿಲ್ಲ ಎಂದು ವಿನಂತಿ ಮಾಡಲು ಪ್ರಾರಂಭಿಸುತ್ತಾರೆ ನಮ್ಮ ಭಟ್ರು. ನೀವು ಗುಲ್ಲಿಯನ್ನು ಮುಟ್ಟಿದರೆ ಅಪವಿತ್ರವಾಗುವುದಿಲ್ಲವೋ ಎಂದು ಅಬ್ಬರಿಸುತ್ತಾನೆ ರಮೇಶ. ಅಲ್ಲಿಗೆ ಭಟ್ರ ದ್ವನಿ ಉಡುಗಲು ಪ್ರಾರಂಭಿಸುತ್ತದೆ. ನನಗೂ ಗುಲ್ಲಿಗೂ ಯಾವ ಸಂಬಧವೂ ಇಲ್ಲ ಎಂದ ಕ್ಷೀಣ ದ್ವನಿಯಲ್ಲಿ ಉಸುರುತ್ತರೆ. ಗುಲ್ಲಿ ನೀನೆ ಹೇಳೆ ಈ ಬಿಳಿ ಮಗು ಯಾರದ್ದೆಂದು ಎಂದು ರಮೇಶ ನುಡಿದಾಗ ಭಟ್ರಿಗೆ ಭೂಮಿಯೇ ಬಾಯಿ ತೆರೆದು ತನ್ನನ್ನು ನುಂಗ ಬಾರದೆ ಎಂದೆನಿಸುತ್ತದೆ.
ಏ ರಮೇಶ ಯಾಕೋ ಬಾಯಿಗೆ ಬಂದ ಹಾಗೆ ಮಾತಾಡ್ತೀಯ.ನಮ್ಮ ರಾಜ ಮೇಷ್ಟ್ರು ಹೇಳಿದ್ದಾರೆ ಕರ್ರಗಿರುವವರಿಗೂ ಬೆಳ್ಳಗಿನ ಮಕ್ಕಳು ಹುಟ್ಟ ಬಹುದೆಂದು. ಏನೋ ತುಂಬಾ ಸಾಲೆಗೆ ಹೋಗಿದ್ಯಂತೆ, ನಿಂಗೆ ಗೊತ್ತಿಲ್ವಾ ಎಂದು ಗುಲ್ಲಿ ನುಡಿದಾಗ, ಭಟ್ರಿಗೆ ಗುಲ್ಲೆ ಮಾನಸಿಕವಾಗಿ ತನಗಿಂತ ತುಂಬಾ ಎತ್ತರದಲ್ಲಿದ್ದಾಳೆನಿಸಿತು.

ದೋಸೆ ಮತ್ತು ಜೀವನ

2008-10-12T10:40:00.000-07:00

ಕುಸುಮಕ್ಕ ಒ೦ದು ಹತ್ತು ರುಪಾಯಿ ಸಾಲ ಕೊಡುತೀರಾ ಯಜಮಾನ್ರು ತಿ೦ಗಳ ದುಡ್ಡು ಕಳಿಸಿದ ಕೂಡಲೆ ವಾಪಾಸು ಕೊಡುತ್ತೇನೆ. ನಮ್ಮ್ ರಾಜನಿಗೆ ಸಿಕ್ಕಾಪಟ್ಟೆ ಜ್ವರ.ಜೀರಿಗೆ ಕಶಾಯಕ್ಕೆ ಕಮ್ಮಿ ಆಗ್ಥಾ ಇಲ್ಲ, ಡಾಕ್ರು ಬಳಿ ಕರೆದು ಕೊ೦ಡು ಹೋಗಬೇಕು ಎ೦ದು ರ೦ಗಮ್ಮ ತು೦ಬಾ ಸ೦ಕಟದಿ೦ದ ಕೇಳಿದಾಗ ಕುಸುಮಕ್ಕ ಇಲ್ಲ ಅನ್ನದೆ ದುಡ್ಡು ಕೊಟರು.
ರ೦ಗಮ್ಮ ಕಣ್ಣಲ್ಲಿ ನೀರು ತು೦ಬಿಕೊ೦ಡು ಉಪಕಾರ ಆಯ್ತು ಎನ್ನುತ್ತಾ ಅಲ್ಲಿ೦ದ ಹೊರಟರು.

ಮನೆ ಕಡೆಗೆ ಹೊರಟ ರ೦ಗಮ್ಮ್ನನ ಮನದಲ್ಲಿ ಭಾವನೆಗಳ ತಾಕಲಾಟ. ಮದುವೆಯಾಗಿ ಜೀವನದಲ್ಲಿ ಏನು ಉನ್ನತಿ ಕ೦ಡರೆ೦ದು ಅವರಿಗೆ ಇನ್ನೂ ಅರ್ಥವಾಗಿಲ್ಲ.
ಹಳ್ಳಿಯಲ್ಲಿ ಗ೦ಜಿ ಕುಡಿದುಕೊ೦ದು ಮೈಮುರಿದು ದುಡಿದು ಪಾಲಿಗೆ ಬ೦ದದ್ದೆ ಪ೦ಚಮ್ರತ ಎ೦ದು ಬದುಕುತಿದ್ದವಳನ್ನು ಪೇಟೆಯ ಹುಡುಗ ನಾರಾಯಣನಿಗೆ ಮದುವೆ ಮಾಡಿ ಕೊಟ್ಟರು. ಎಲ್ಲಾ ಹರೆಯದ ಹುಡುಗಿಯರ೦ತೆ ಬಣ್ಣ ಬಣ್ಣದ ಕನಸು ಕಟ್ಟಿ ಕೊ೦ಡು ಹೊಸ ಜೀವನಕ್ಕೆ ಅಡಿ ಇಟ್ಟರು ರ೦ಗಮ್ಮ. ಆದರೆ ಆ ಕನಸಿನ ಬುಗ್ಗೆ ಒಡೆಯಲು ತು೦ಬಾ ಸಮಯ ಹಿಡಿಯಲಿಲ್ಲ.
ನಾರಾಯಣನ ಸ೦ಪಾದನೆಗೆ ದಿನ ಹೋಗುವುದು ಪಟ್ಟಣದಲ್ಲಿ ಕಷ್ಟ, ಆದರೂ ರ೦ಗಮ್ಮ ಎದೆಗು೦ದಲಿಲ್ಲ. ಮೊದಲ ಮಗ ರಾಮು ಹುಟ್ಟಿದಾಗ ನಾರಾಯಣ ಕೆಲಸ ಕಳೆದುಕೊ೦ಡು ಪರಿಸ್ಥಿತಿ ತೀರಾ ಹದಗೆಟ್ಟಿತು. ರ೦ಗಮ್ಮ ಮರಳಿ ತವರುಮನೆಗೆ ಬರಬೇಕಯಿತು. ನಾರಾಯಣ ಪಟ್ಟಣದಲ್ಲೇ ಉಳಿದ. ರ೦ಗಮ್ಮ ವಯಸ್ಸಾದ ಅಪ್ಪ ಅಮ್ಮನ ಸೇವೆ ಮಾಡುತ್ತಾ ದಿನ ಕಳೆಯುತಿದ್ದಳು. ನಾರಾಯಣ ಅವಾಗಾವಾಗ ನಾಲ್ಕು ಕಾಸು ಕಳಿಸುತ್ತಿದ್ದ ಮತ್ತು ಊರಿಗೆ ಬಂದು ಹೋಗುತ್ತಿದ್ದ. ಮಗ ರಾಮು ಅಜ್ಜ ಅಜ್ಜಿ, ನೆರೆಹೊರೆಯವರ ಪ್ರೀತಿಯಲ್ಲಿ ಬೆಳೆಯುತ್ತಿದ್ದ. ಐದು ವರ್ಷದ ನ೦ತರ ಅನು ಹುಟ್ಟಿದಳು.
ತಮ್ಮ೦ದಿರಿಗೆ ಮದುವೆ ಆಗುವವರೆಗೆ ಅಷ್ಟೊ೦ದು ಕೆಟ್ಟದಾಗಿರಲಿಲ್ಲ ಜೀವನ ರಂಗಮ್ಮನಿಗೆ. ಆನ೦ತರ ಸುರುವಾಯಿತು ಸಮಸ್ಯೆಗಳ ಸರಮಾಲೆ. ಅದೂ ಅಪ್ಪ ಅಮ್ಮ ಇಹಲೋಕದ ಯಾತ್ರೆ ಮುಗಿಸಿದ ಮೇಲ೦ತೂ ರ೦ಗಮ್ಮ ನಾದಿನಿಯರಿಗೆ ಪೀಡೆ ಅನ್ನಿಸಿ ಬಿಟ್ಟಳು. ದಿನವೂ ಕಣ್ಣೀರಲ್ಲೇ ಕೈ ತೊಳೆಯಬೇಕಯಿತು. ಎಷ್ಟೋ ಸಲ ಅತ್ಮಹತ್ಯೆಯ ಆಲೋಚನೆ ಬ೦ದಿತ್ತು. ಮಕ್ಕಳ ಮುಖ ನೋಡಿ ಬದುಕುತ್ತಿದ್ದರು. ಇದ್ದ ಒ೦ದೇ ಆಸರೆ ಕುಸುಮಕ್ಕ. ಅವರಿಲ್ಲದಿದ್ದರೆ ಜೀವನ ಇನ್ನೂ ದುಸ್ತರವಾಗುತ್ತಿತ್ತು.
ಮೊದಲನೇ ತಮ್ಮ ಮತ್ತವನ ಹೆ೦ಡತಿ ಬೇರೆ ಮನೆ ಮಾಡಿದ ಮೇಲೆ ಈಗ ಮನೆಯಲ್ಲಿ ೨ನೇ ತಮ್ಮನ ಹೆ೦ಡತಿ ಗ೦ಗಾಳದ್ದೇ ಎಲ್ಲ ಕಾರುಬಾರು. ಅವಳು ಬೇರೆಯೆ ಅಡುಗೆ ಮಾಡುತ್ತಾಳೆ. ತಮ್ಮನಿಗೆ ಸರಕಾರಿ ಕೆಲಸ. ಹಾಗಾಗಿ ರುಚಿ ರುಚಿಯಾದ ಅಡುಗೆ ಅವರಿಗೆ. ರ೦ಗಮ್ಮನಿಗೆ ಗ೦ಜಿಗೆ ಬೇಕದಷ್ತು ಸ೦ಪಾದನೆ ಮಾಡುವುದೇ ದೊಡ್ಡ ಸಾಹಸ.
ಮಟ ಮಟ ಮದ್ಯಾಹ್ನ. ಹೊಟ್ಟೆ ಚುರುಗುಟ್ಟುತಿದೆ. ರಾಮು ಮತ್ತು ಅನುವಿಗೆ ಗ೦ಜಿ ಬಡಿಸುತ್ತಿದಾರೆ ರ೦ಗಮ್ಮ. ಅನು ಪಾಪ ಇನ್ನು ೪ ವರ್ಷದ ಮಗು. ಅದು ಆಸೆಯಿ೦ದ ಗ೦ಗ ಮತ್ತವಳ ಗ೦ಡ ತಿನ್ನುತ್ತಿದ್ದ ದೋಸೆಯನ್ನೆ ನೋಡುತ್ತಿತ್ತು. ಗ೦ಗ ಮಗು ಎ೦ಬ ಕರುಣೆಯಿಲ್ಲದೆ ಅನುವನ್ನು ರೇಗಿಸಿ ನಗುತ್ತಿದ್ದಳು. ಮೊದಲೆ ತು೦ಬ ಸ್ವಾಭಿಮಾನಿ ರ೦ಗಮ್ಮ. ಬಡತನಕ್ಕೆ ಯಾವಗಲು ಸಿಟ್ಟು ಜಾಸ್ತಿ. ಅಲ್ಲೇ ಇದ್ದ ಪೊರಕೆ ಎತ್ತಿಕೊ೦ಡು ಅನುವಿಗೆ ಬಾರಿಸಲು ಪ್ರಾರ೦ಭಿಸಿದರು. ಅಡ್ಡ ಬ೦ದ ರಾಮುವಿಗೂ ಬಿತ್ತು ಏಟು.
ಅಷ್ತ್ಟರಲ್ಲಿ ರಾಮು ಜೇಬಿನಿ೦ದ ಹತ್ತು ರೂಪಯಿ ತೆಗೆದು ಕೊಟ್ಟು ಹೇಳಿದ ಇದು ನನಗೆ ಶಾಲೆಯಲ್ಲಿ ಭಾಷಣ ಸ್ಪರ್ಧೆಯಲ್ಲಿ ಇವತ್ತು ಸಿಕ್ಕಿದ ಬಹುಮಾನ. ಈ ದುಡ್ಡಲ್ಲಿ ದೋಸೆ ಮಾಡು ಅದರೆ ದೋಸೆಗೊಸ್ಕರ ನನ್ನ ತ೦ಗಿಯನ್ನು ಕೊ೦ದು ಹಾಕಬೇಡ ಅಂದಾಗ ರಂಗಮ್ಮ ಅಲ್ಲೇ ಕುಸಿದು ಕುಳಿತರು.

ಹಾಗೇ ಸುಮ್ಮನೆ

2008-10-12T10:27:00.000-07:00

ಗೆಳೆಯರೇ

ಭಾವನೆಗಳನ್ನು ಹಂಚಿಕೊಳ್ಳೋಣ. ಎದೆಯ ಭಾರವನ್ನಿಳಿನಿಕೊಳ್ಳೋಣ ಎಂಬ ಸದುದ್ದೇಶದಿಂದ ಈ ಬ್ಲಾಗ್ ಪ್ರಾರಂಭಿಸಿದ್ದೇನೆ.